حكومه‌تا ئه‌لمانیا ب هه‌ماهه‌نگى دگه‌ل زانكۆیا دهۆكێ، ئه‌ڤرۆ چارشه‌مبى 16-6-2021ێ ل ناڤه‌ندا باژێرێ دهۆكێ بۆ ئێكه‌م جار كلینیكه‌كا تایبه‌ت ب چارەسەركرنا نه‌خۆشیێن ده‌رونى ڤه هات ڤه‌كرن.
بێوار موسا، په‌یڤدارێ زانكۆیا دهۆكێ دیاركر: “زانكۆیا دهۆكێ هه‌ماهه‌نگیه‌كا باش دگه‌ل وه‌لاتێ ئه‌لمانیا هه‌یه ب تایبه‌ت ژ لایێ زانستى ڤه كۆ ل ده‌مێن بۆرى دا هژماره‌كا قۆتابیێن هنده‌ك پشكان بۆ وه‌لاتێ ئه‌لمانیا هاتبوونه هنارتن ب مه‌ره‌ما پتر شاره‌زابوون د زانستێن پێشكێشكرنا چاره‌سه‌ریێن ده‌رونى، ئه‌ڤرۆ زانكۆیا دهۆكێ ب هه‌ماهه‌نگیا حكومه‌تا وه‌لاتێ ئه‌لمانیا كلینیكه‌كا تایبه‌ت ب چاره‌سه‌ریێن نه‌خۆشیێن ده‌رونى ڤه هاته ڤه‌كرن”.
په‌یڤدارێ زانكۆیا دهۆكێ ئاشكرا كر: “كو هه‌ر كه‌سه‌ك ل پارێزگه‌ها دهۆكێ كۆ هه‌لگرێ نه‌خۆشیه‌كا ده‌رۆنى بیت، دشێت قه‌ستا وێ كلینیكێ بكەت و ژلایێ نۆژدارێن خۆدان شیان ڤه دێ چاره‌سه‌ریێن نه‌خۆشیێن ده‌رونى وه‌رگرن و ڤه‌كرنا ڤێ كلینیكێ پێنگاڤه‌كا باشه بۆ خزمه‌تكرنا خه‌لكێ دهۆكێ كۆ به‌رى نها ئه‌ڤ كاره نه‌هاتیه ئه‌نجام دان”.
ئاماژه ژى دا: “ل ڤێ كلینیكیێ دێ هژماره‌كا زۆر ژ ده‌رچوویێن زانكۆیا دهۆكێ كۆ ژ به‌شێن جۆدا جۆدا یێن تایبه‌تمه‌ند ب نه‌خۆشیێن ده‌رونى ڤه شێن چاره‌سه‌ریان پێشكێشى نه‌خۆشان كه‌ن و د هه‌مان ده‌م دا دێ هژماره‌كا نۆژدارێن ئه‌لمانیا ژى ل ڤێ كلینیكێ به‌رهه‌ڤ بن و خزمه‌تا نه‌خۆشان بكه‌ن”.
خانى نیوز، مه‌تین عومه‌ر
