د.گه‌لاوێژ عوبێد: بریارا سه‌رۆكێ حكومه‌تێ رۆله‌كێ گرنگ بۆ چاره‌سه‌رێن نه‌خۆشێن په‌نجه‌شێرێ هه‌یه‌

ئه‌ندامه‌كا لژنا ساخله‌مى ل په‌رله‌مانێ کوردستانێ دبێژیت، ته‌رخانکرنا كۆژمێ ملیاره‌ك و شه‌ش سه‌د ملیۆن دیناران ژ ئالیێ مه‌سرور بارزانی سه‌رۆك وه‌زیرێن هه‌رێمێ بۆ نه‌خۆشخانێن په‌نجه‌شێرێ ل هه‌رێما کوردستانێ رۆله‌كێ گرنگه‌ بۆ‌ چاره‌سه‌رکرنا ئاریشێن كێم ده‌رمان و دابینکرنا پێدڤیێن پزیشکی.

د.گه‌لاوێژ عوبێد، ئه‌نداما لژنا ساخله‌میێ ل په‌رله‌مانێ كوردستانێ راگه‌هاند، دابینكرنا كۆژمێ ده‌رمانان بۆ چاره‌سه‌ربوویێن تووشبوویێن په‌نجه‌شێرێ ژ بزاڤێن به‌رده‌وام یێن حكومه‌تا هه‌رێما كوردستانێ نه‌ و نابیت بابه‌تێ نه‌خۆشێن په‌نجه‌شێرێ تێكه‌لى سیاسى بهێته‌ كرن ژبه‌ركو پێشتر لژنا ساخله‌میێ دگه‌ل شانده‌كێ نه‌خۆشخانا هیوا ل سه‌ر هێل بوون بۆ چاره‌سه‌ركرنا ئاریشه‌یان.

د.گه‌لاوێژ عوبێد گۆت، هه‌تا نها باشترین جۆرێ ده‌رمانان بۆ نه‌خۆشێن په‌نجه‌شێرێ دهێته‌ دابین كرن سه‌ره‌راى گرانیا بهایێن ده‌رمانان و ب ده‌ست ڤه‌ ئینانا وان كاره‌كێ ب ساناهى نینه‌ و دنها دا هه‌ژماره‌كا زۆر ژ وه‌لاتیێن ناڤه‌راست و باشوورێ ئیراقێ ل نه‌خۆشخانێن كوردستانێ چاره‌سه‌ریێ وه‌ردگرن و ئه‌ڤێ بارگرانى دروست كرییه‌.

ئه‌نداما لژنا ساخله‌میێ ل په‌رله‌مانێ كوردستانێ دیاركر: رێژه‌یا تووشبوونێ ب نه‌خۆشیا په‌نجه‌شێرێ د زێده‌بوونێ دایه‌ و پێدڤیه‌ ناڤه‌ندا ساخله‌مى و ئه‌کادیمى ڤه‌كۆلینێن باش ل دۆر حاله‌تێن زێده‌بوونێ بكه‌ن و ئه‌گه‌ران به‌رچاڤ بكه‌ن و رێیا هشیاریێ بده‌نه‌ وه‌لاتیان.