ئێكه‌تیا ئافره‌تێن كوردستانێ ب هه‌لكه‌فتا رۆژا جیهانیا نه‌هێلانا توندوتیژیا سێكسى په‌یامه‌ك به‌لاڤكر و راگه‌هاند، پێدڤیه رێك نه‌هێته‌دان ئێدى ئافره‌ت و ژنێن كوردستنانێ ب تایبه‌ت ئافره‌تێن شنگال و ده‌شتا نه‌ینه‌وا ببنه قوربانى مێشكێ توندوتیژى و وێرانكاریێ.
ئێكه‌تیا ئافره‌تێن كوردستانێ راگه‌هاند، ئێكه‌تیا ئافره‌تێن كوردستانێ ل ده‌سپێكا دروستبوونا شه‌رێ داعش هاریكاریێن مرۆڤى ب شێوه‌یێن جودا گه‌هاندیه خۆشك و برایێن ئێزدى ب تایبه‌ت ئافره‌تان ژبه‌ركو پتر پێدڤى ب هاریكاریێن مرۆڤى بوون.
هه‌روه‌سا ئێكه‌تیا ئافره‌تێن كوردستانێ دیاركر، ئه‌و بزاڤێن بۆ قه‌ره‌بووكرنا ئالیێ ده‌روونی یێن رزگاربویێن ده‌ستێ داعش دهێنه كرن جهێ ده‌ستخوشیێ نه و پێدڤیه ب بزاڤێن هه‌موو ئالیان ژیانه‌كا نوو بۆ رزگاربوویێن ده‌ستێ داعش ل جهێن وان بهێته به‌رقراركرن د چارچووڤێ پاراستنا سه‌قامگیرى و ئاشتى و ئاسایشا ل ده‌ڤه‌رێن وان دا.
ئێكه‌تیا ئافره‌تێن كوردستانێ ئاماژه كر، ب هه‌لكه‌فتا رۆژا جیهانیا نه‌هێلانا توندوتیژیا سێكسى سەرێ رێزێ بۆ وان ئافره‌تان دچه‌مینین یێن د شه‌ر و هه‌ڤركیان دا تووشى بارگرانى و نه‌خۆشیێ بووین .
نه‌ته‌وه‌یێن ئێكگرتى ل رۆژا 19ی خزیرانا سالا 2015 بریارا نه‌هێلانا توندوتیژیا سێكسی ل شه‌ر و هه‌ڤركیێ دا بۆ پاراستن و ئه‌و ئافره‌تێن تووشی توندوتیژیێ بووین ده‌ركر.
