توركیا رێكارێن كۆرۆنایێ سڤك دكه‌ت

سه‌رۆك كۆمارێ توركیا راگه‌هاند؛ وه‌لاتێ وى دێ ده‌ست ب ئاسانكرنا رێكارێن تۆند یێن به‌لاڤبوونا ڤایرۆسێ كۆرۆنایێ كه‌ت.

ره‌جه‌ب ته‌یب ئه‌ردۆگان، سه‌رۆك كۆمارێ توركیا راگه‌هاند؛ ل ده‌ستپێكا مه‌ها بهێت وه‌لاتێ وى دێ ده‌ست ب ئاسانكرنا وان رێكاران كه‌ت یێن بۆ رێگریكرنا به‌لاڤبوونا ڤایرۆسێ كۆرۆنایێ گرتینه‌به‌ر پشتى هژمارا توشبوویان بۆ 5 هزار حاله‌تێن رۆژانه‌ كێم بووى.

گۆت ژى: ژ 1ى مه‌ها بهێت قه‌ده‌غه‌یا سه‌رتاسه‌رى دێ هێته‌ راكرن و سازییێن حكومى دێ ده‌ست ب ده‌واما درۆست كه‌ن و هاتنوچوونا گشتى و گه‌شتكرن دناڤبه‌را وه‌لاتان دا دێ ئاسایى بیت.

دیار ژى كر، حه‌فتییا بوورى وه‌لاتێ وى ل سه‌رێ لیستا وان وه‌لاتان بوو یێن پترین خه‌لكێ وێ ڤاكسین وه‌رگرتین و ئه‌و دخوازن دده‌مێ چه‌ند حه‌فتییێن بهێت دا ڤاكسینى بۆ هه‌موو وه‌لاتییێن خوه‌ یێن ژیێ وان دسه‌ر 18 سالان دا دابین كه‌ن.

راگه‌هاندنا سه‌رۆكێ توركیا پشتى وێ یه‌كێ هات كۆ حه‌فتییا بوورى 5 ملیۆن قۆرچێن ڤاكسینێ سینۆڤارم یێ چینى گه‌هشتنه‌ توركیا و پترى 1 ملیۆن وه‌لاتییان د رۆژه‌كێ دا ڤاكسین وه‌رگرتییه‌.