ژبەر نەدانا باجێ ب سه‌دان كۆمپانى داینە دادگەهێ

رێڤەبەرێ گشتی یێ باجێ ل هەرێما کوردستانێ تایبەت بۆ خانی نیوز گۆت، پرۆسا رێکخستنا چەسپاندنا باجێ بۆ وان کۆمپانیایێن کو ل دووڤ قانوونێ دڤێت باجێ بدەنە حکومەتێ یا بەردەوامە.

کەمال وەرتی گۆت ژی، د دەمێ بورى دا هەموو کۆمپانیان باج ل سەر هاتیە دان، ژبەر هندێ ئەو د نوکە مژوولی رێکخستنا حیسابا دووماهیێ یا کۆمپانیانە دا کو ب ڤێ رێکێ بزانن داهاتێ وان چەندە و تەرکیزا وان زێدەتر ل سەر کۆمپانیێن مەزنە.

رێڤەبەرێ باجێ گۆت ژی، ل دووڤ قانوونێ هەر جهـ یان کۆمپانیا یان سازییا قازانجێ بکەت، دڤێت باجێ بدەتە گەنجینا حکومەتێ، رێژا باجا چەسپاندی ل سەر بنەمایێ 15%ێ قازانجێ ژ کۆمپانیان وەردگرن.

ئەو ژی دیار کر، ل هەموو جیهانێ چەسپاندنا باجێ ب رێیا قانوونێ دهێتە رێکخستن و دگەل هندێ ژی دا ئەڤە ئەگەرەکە بۆ زێدەبوونا داهاتێ حکومەتێ و هه‌تا نها ڤێ چەندێ ئەنجامێن دلخۆشکەر یێن هەبووین و ل دووماهیا سالێ دێ ب روونی هێتە بەرچاڤکرن.

ل داویێ گۆت ژى، د دەمێ بوری دا ژبەر نەدانا باجێ ناڤێن سەدان کۆمپانیان هاتینە رەوانەکرن بۆ دادگەهێ.