ئیراق دێ ئێكه‌م كۆنفرانسێ هه‌رێمی سازكه‌ت

ئیراق دێ ئێكه‌م كۆنفرانسێ وه‌لاتێن ده‌وروبه‌ر یێ هه‌رێمی ل داویا ڤێ مه‌هێ سازكه‌ت و سه‌رۆكێن چه‌ندین وه‌لاتان دێ پشكدار بن.

نڤێسینگه‌ها سه‌رۆكوه‌زیرێن ئیراقێ راگه‌هاند؛ ئیراق دێ ئێكه‌م كۆنفرانسێ وه‌لاتێن ده‌وروبه‌ر یێ هه‌رێمێ ل داویا ڤێ مه‌هێ ل ئیراقێ سازكه‌ت و ئه‌ڤرۆ ئیمانوێل ماكرۆن، سه‌رۆككۆمارێ فره‌نسا د په‌یوه‌ندیه‌كا تێله‌فونی دا دگه‌ل موسته‌فا كازمی پشته‌ڤانییا خوه‌ بۆ كۆنفرانسی راگه‌هاند و دوپاتكر دێ پشكداری كۆنفرانسی بیت و هه‌روه‌سا سه‌رۆكوه‌لاتێن ده‌وروبه‌ر ژی دێ پشكداربن.

ئیمانوێل ماكرۆن د په‌یوه‌ندییا خوه‌ دا دیار ژی كر، فره‌نسا پشته‌ڤانییا ئیراقێ و رێبازا سه‌رۆكوه‌زیرێن ئیراقێ ل دووڤ دچیت و رێكارێن باشتركرنا سازیێن ده‌وله‌تا ئیراقێ دكه‌ت.

ئیراق ب هه‌ڤكارییا فره‌نسا به‌رهه‌ڤییان بۆ ئێكه‌م كۆنفرانسێ وه‌لاتێن ده‌وروبه‌ر یێ هه‌رێمی دكه‌ت ب ئارمانجا گۆتوبێژا هه‌ڤركییا سیاسی و ئێمناهی یا كو وه‌لاتێن ده‌ڤه‌رێ د په‌یوه‌ندیێن دوقۆلی دا رووبروو دبن بتایبه‌ت د وارێ ئابوری و ئاڤه‌دانكرنێ دا.