دەستەیا ڤەکۆلین و کۆمڤەکرنا بەلگەیان ل حكومه‌تا هه‌رێما كوردستانێ بۆ خانی نیوز گۆت: بەغدا خەمساریێ د هلدانا رۆفات و گۆرێن بکۆم یێن ئێزدیان ل شنگالێ دکەت.
رائد فەلاح حه‌سه‌ن، ل ده‌سته‌یا ڤه‌كۆلینێ بۆ خانی نیوز راگەهاند؛ دەستەیا ڤەکۆلین و کۆمڤەکرنا بەلگەیان چەندین جاران داخواز ژ حکومەتا بەغدا کرینە ئەو گۆرێن بکۆم و رۆفاتێن ئێزدیێن قوربانیێن داعشێ ل شنگالێ ماین بهێن هلدان ژبەرکو باران بسەر رۆفاتان دا هاتییە و ژبەر گەرمێ تووشی سۆتنێ دبن و هلدانا وان گیرۆ بوویە، لێ حکومەتا بەغدا خەمساریێ دکەت و بابەتی ب مەزناتییا کارەساتێ وەرناگریت و هێجەتێن وان ژی ئەون کو ئابوورێ وان یێ کێمە و نەئامادەبوونا تیمێن نەتەوەیێن ئێکگرتی وەک سەرپەرشتیار بۆ خوە بکاردئینن و پشکنینێن رۆفاتێن هلداین بداوی نەهاتینە.
ناڤبری دیار ژی کر، ئەوان وەکو تیمێ دەستەیا ڤەکۆلینێ و حکومەتا هەرێما کوردستانێ ئامادەبوونا خوە دیارکریە کو بچن شنگالێ و کار ل سەر هلدانا گۆرێن مایی بکەن لێ بریار ل سەر تیمێ بەغدا یە و ئەو ژی د بێ بەرسڤن.
ژ تیمێ هلدانا گۆران ل بەغدا نزیکی ٢٠ کەسانن و وان تەنێ کەسەک ل بەغدا هەیە نوونەراتییا گۆرێن بکۆم بکەت، ئەو ژی نوونەراتییا شەهید و ئەنفالکریێن کوردستانێ هەموویێ دکەت لەورا کەسەکێ بتنێ نکاریت تیمەکێ بلڤینیت.
تا نها ٨٢ گۆرێن بکۆم ل شنگالێ هاتینە دیتن، ٣٢٥ رۆفات هاتینە هلدان و بۆ بەغدا هنارتینە، ١٠٤ ژ وان هاتینە زڤراندن و ل شنگالێ بنئاخکرینە و ٢٢١ رۆفات نەهاتینە هلدان
