پشتى روودانێن ئه‌فغانستانێ ده‌مێ چه‌ند رۆژه‌كانه پێله‌كا سیاسى و میدیایى ب ئاراسته‌یا دروستكرنا بێ هیڤى بوونێ دناڤ خه‌لكێ كوردستانێ دا و كار بۆ به‌راوردكرنا دناڤبه‌را هه‌رێما كوردستانێ و ئه‌فغانستانێ دا دكه‌ن،ل ڤێره پێدڤییه هه‌موو لایه‌ك باش بزانن كو هه‌ر ملله‌ته‌ك ئه‌گه‌ر پشتا خوه ب شیانێن خوه نه گرێده‌ت، به‌رده‌وام ئه‌گه‌رێ هه‌ره‌شێ و ناڤچوونێ ل سه‌ره، پالپشتییا خه‌لكى ژى ل وى ده‌مى بها هه‌یه و كاریگه‌رى دێ هه‌بیت.
جوداهییه‌كا زۆر دناڤبه‌را ئه‌فغانستانێ و كوردستانێ دا هه‌یه، جیاوازییه‌كا زۆر ژى دناڤبه‌را پێشمه‌رگه و سوپایێ ئه‌فغانستانێ دا هه‌یه، پێشمه‌رگه زاده‌ی مێژوو و خۆێن و فرمێسكى گه‌لى كوردستانه، خودانا سه‌دان داستانێن مێژوویى و قاره‌مانییه، نموونه ژى داستانا كۆرێ و تێكشكاندنا ئه‌فسانه‌یا داعشێ و داستانێن پردێ و سحێلان كو نه‌یارێن كوردستانێ پیلانا وان ئه‌و بوو كو ئیراده‌یا گه‌لێ كوردستانێ بشكێنن، به‌لێ پێشمه‌رگه‌ى و گه‌لێ كوردستانێ ب خوراگرىیا وان شیان پیلانێن نه‌یاران و دوژمنان هه‌لوه‌شینن.
دڤێره‌دا من دڤێت خه‌لكێ كوردستانێ پشت راست بكه‌م كو ره‌وشا كوردستانێ جوداهییه‌كا زۆر هه‌یه دگه‌ل هه‌موو جهێن دیتر، شوكر بۆ خودایێ مه‌زن مه پێشمه‌رگه‌یێن قاره‌مان و هێز هه‌یه و یا ژ هه‌موویان گرنگتر ژى ملله‌تێ خودان ئیراده و قه‌زییه‌نه، ئه‌گه‌ر دوژمنان و نه‌حه‌زان خه‌یالا هندێ هه‌بیت ئازارا خه‌لكێ كوردستانێ بده‌ن، هه‌رگیز ب ساناهى حه‌زێن وان سه‌رناگرن، و ب شت راستى د ئاینده‌ى ژى دا ب ساناهى حه‌زێن وان سه‌رناگرن، هه‌ر كه‌سه‌كێ دڤێت نائومێدى و خوه ب كه‌م زانین بدانیت و نه‌ره‌حه‌تیێ دناڤ خه‌لكى دا به‌لاڤبكه‌ته‌ڤه دیاره هێشتا نه‌شیایه ل ئیراده و خوراگرییا گه‌لێ خوه تێبگه‌هیت.
