ویلایه‌تێن یه‌كگرتیێن ئه‌مریكا دێ پشكداریێ د جێبه‌جێكرنا ژماره‌یه‌كا پرۆژێن كاره‌با هه‌رێما كوردستانێ دا كه‌ت و په‌سنا ته‌مامكرنا هێڵا 400 كه‌ی ڤی دناڤبه‌را توركیا – هه‌رێم – عێراق كر.
ل دووڤ راگه‌هاندنه‌كا وه‌زاره‌تا كاره‌بێ، دو تاینتواج به‌رپرسا پشكا سیاسی و ئابورییا كونسوڵخانه‌ییا ئه‌مریكا ل هه‌ولێرێ ب مه‌به‌ستا راگه‌هاندنا هه‌ڤكاری و ئاماده‌ییا وه‌ڵاتێ خوه بۆ پشكداریكرنێ د پرۆژێن كاره‌با هه‌رێمێ سه‌ردانا وه‌زاره‌تا كاره‌بێ كر.
كه‌مال محه‌مه‌د ساڵح وه‌زیری كاره‌بێ راگه‌هاند ، كو دشیان دایه كاره‌بێ ب بۆریێ بۆ وێستگه‌ها كواشێ بهێته ڤه‌گۆهاستن و دێ رۆلێ زێده‌كرنا به‌رهه‌مئینانا كاره‌بێ هه‌بیت.
نوونه‌را ئه‌مریكا سۆز دا كو مه‌زنه كۆمپانیێن وه‌ڵاتێ وێ ب ته‌كنۆلۆژیا و شیانێن به‌رز بینینه هه‌رێما كوردستانێ.
ئه‌و پرۆژێن كاره‌بێ كو ئه‌مریكا دێ پشكدارێ تێدا كه‌ت:
– راكێشانا بۆرییا گازا سروشتی ژ كۆمپانیا دانه‌گاز بۆ وێستگه‌ها 1000 مێگاواتیا كواشێ.
– جێبه‌جێكرنا چه‌ندین پرۆژێن كه‌ى ڤى 400 و وێستگه‌ها كه‌ى ڤى 400 یا كاره‌بێ.
– به‌رهه‌مهئینانا كاره‌بێ ب رێكا سودوه‌رگرتن ژ گازا ب هه‌روه چوویى ژ كێڵگه‌هێن نه‌فتێ.
-پشكداریكرن ل هۆشیارییا گرنگی پێدانا بهایێ كاره‌بێ ژ ئالیێ هه‌ڤپشكێن كاره‌بێ ڤه.
