ب بزاڤێن 600 رۆژنامهڤانان ژ 117 وهلاتان، نێزیكی 12 ملیۆن بهلگهیێن پاندۆرا ژ سهرمایه و رهڤینا باجێ ژ 330 رێبهر و سیاسهتمهدارێن جیهانێ ژ 90 وهلاتان و زێدهتری 100 میلیاردهر ئاشكهرا بوون.
ل بهلگهیێن پاندۆرا دا، کو ژ ئالیێ ههڤپهیمانیا ناڤدهولهتی یا رۆژنامهڤانێن ڤهكۆلهر ڤه هاتیه بهرههڤ کرن، بهلگهیێن دهربارهی شاهێ ئۆردنێ و سهرۆکێن ئازهربایجانێ، کۆمارا چێک، قوبرس، ئوکرینیا و کێنیا ئاشكهرا بوون.
بهلگهیێن کو کهڤتینه دهستێ هندهك دهزگههێن راگههاندنێ وهکو گاردیهن، بی بی سی، واشنگتۆن پۆست و لۆمۆند، پهیمانێن نهێنی و سهرمایهیێن ڤهشارتی یێن مرۆڤێن دهولهمهند و بالادهستێن جیهانێ هاتینه ئاشكهرا كرن.
د لیستهیێ دا زێدهتری 100 میلیاردێر، 35 سهرۆك، سهرۆکوهزیر، سهرۆکێن بهرێ و نوكه یێن جیهانێ، و زێدهتری 300 بهرپرسێن حكوومی ههنه، ههروهسا د ناڤدا وهزیر، دادوهر، رێڤهبهرێن باژێرڤانیان و فهرماندهیێن لهشکری ژ 90 وهلاتان دهێنه دیتن.
قهبارهیا بهلگهیێن پاندۆرایێ 2.9 تهرابایتانه؛ و ژ 2.2 تهرابایتێن بهلگهیێن پانامایێ یێن کو د سالا 2016 ێ دا هاتنه بهلاڤكرن زێدهترن.
ههروهسا ڤان بهلگهیان ئهمریكا وهك ئێك ژ مهزنترین جهێ رهڤین ژباجدانێ ل جیهانێ ددهته نیاسین.
ل گۆری بهلگهیان، مهلیك عهبدوللایێ دویێ شاهێ ئۆردنێ ب کرینا مولكان ل واشنتۆن و لهندهن ئیمپراتۆریهكا ڤهشارتی یا 100 میلیۆن دۆلاری بۆ خوه ئاڤاكریه. ههروهسا دهربارهی کریارێن مالباتا سهرۆکۆمارێ ئازهربایجانێ ئیلهام عهلی ئیێف ژی زانیاری ههنه. ل گۆرهی ڤان بهلگهیان، مالباتا دهستههلاتدارا کۆمارا ئازهربایجانێ د ڤان سالێن داویێدا ل بریتانیا نێزیکێ 400 میلیۆن پۆند بازرگانیێ كریه.
ل بهلگهنامهیان دا سهرۆکوهزیرێ بهرێ یێ بریتانیایێ تۆنی بلێر و ژنا وی ژی دهێنه دیتن. ڤان بهلگان دیار دکهن کو ب رێكا كۆمپانیهكا خزمهتگوزاریێن دهریایی، شیاینه خانیهک 6 ملیۆن و 450 هزار پۆندی ل لهندهن بۆ خوه ل بكرن.
