بابه‌كر زێبارى: ژ لایێ له‌شكه‌رى ڤه‌ هه‌ماهه‌نگییه‌كا باش دناڤبه‌را هه‌رێما كوردستانێ و حكومه‌تا فیدرال دا هه‌یه‌

بابه‌كر زێبارى شیره‌تكارێ له‌شكه‌رى یێ سه‌روكێ هه‌رێما كوردستانێ، راگه‌هاند: نوكه‌ ژلایێ له‌شكرى ڤه‌ هه‌ماهه‌نگیه‌كا باش دناڤبه‌را هه‌رێما كوردستانێ و حكومه‌تا فیدرال دا هه‌یه‌ و به‌رده‌وام سه‌باره‌ت ره‌وشا ئه‌منى و له‌شكرى كومبوون دێ هێنه‌ كرن. بتایبه‌تى سه‌باره‌ت زێده‌بوونا لڤینێن تیرورستێن داعش.

بابه‌كر زێبارى گوت ژى: دو لیوایێن هه‌ڤپشك دناڤبه‌را وه‌زاره‌تا پێشمه‌رگه‌ى‌ و به‌رگرییا عیراقێ دا هاتینه‌ پێكئینان كو نیڤا وان كوردن و نیڤا دیتر سه‌ر ب حكومه‌تا فیدرال ڤه‌ نه‌” ئانكو دو لیوایێن هه‌ڤپشكن و ئه‌و سه‌ربازێن كورد نوكه‌ د مه‌شق و راهێنانێ دانه‌.

بابه‌كر زێبارى ئاماژه‌ ب وێ چه‌ندێ ژى كر: بنه‌جهكرنا وان هه‌ردو لیوایێن هه‌ڤپشك دێ كارتێكرن ل سه‌ر ره‌وشا وان ده‌ڤه‌ران هه‌بیت و هیڤیدارین د قووناغا بهێت دا ژى پێنگاڤێن دیتر لدووڤ خودا بینیت بۆ وێ چه‌ندێ ره‌وشا وان ده‌ڤه‌ران بهێته‌ كونترۆلكرن.