شانده‌كێ حكومه‌تا هه‌رێمێ دێ سه‌ره‌دانا به‌غدا كه‌ت

شانده‌كێ حكومه‌تا هه‌رێما كوردستانێ دگه‌ل به‌رپرسێن بلند یێن عیراقێ ئه‌ڤرۆ ب مه‌ره‌ما دانوستاندن لدور ئاریشا په‌ترۆل و گازا هه‌رێما كوردستانێ، دێ سه‌ره‌دانا به‌غدا كه‌ت.
د وێ كۆمبوونێ دا، ئه‌و شاندێ حكومه‌تا هه‌رێمێ دێ دانوستاندنێ لدور بریارا دادگه‌ها بلندا فیدرال كه‌ن، كول رۆژا 15-2-2022ده‌ركه‌فتبوو و تێدا فروتنا په‌ترول و گازێ ژ لایێ هه‌رێما كوردستانێ ب نه‌یاسایى وه‌سف كر.
به‌رى نوكه‌ جوتیار عادل، په‌یڤدارێ حكومه‌تا هه‌رێما كوردستانێ راگه‌هاندبوو، دانوستاندنا شاندى دگه‌ل به‌رپرسێن عیراقێ درێژه‌ پێده‌را وان دانوستاندنایه‌ یێن ل ده‌ستپێكا پێكئینانا حكومه‌تێ دگه‌ل به‌غدا مه‌ ده‌ستپێكرى.
ئه‌و شاند ژ ئومئید سه‌باح، سه‌رۆكێ دیوانا سه‌رۆكاتیا جڤاتا وه‌زیران، خالد شوانى، وه‌زیرێ هه‌رێمێ بۆ كاروبارێٍن به‌غدا، ئامانج ره‌حیم، سكرتێرێ جڤاتا وه‌زیران و، عه‌بدولحه‌كیم، سه‌رۆكێ فه‌مانگه‌ها هه‌ماهه‌نگى و دیفچوونێ پێكدهێت.