مەكتەبا سیاسی یا پارتی دیموكراتی كوردستان ب هه‌لكه‌فتا (48) مین سالڤه‌گه‌را بۆردومانا قەڵادزێ پەیامه‌ك به‌لاڤكر و ئه‌ڤه ده‌قێ وێیه:
ئەڤرۆ (48) سال ب سەر بۆمبارانكرنا باژێرێ خوراگرێ قەڵادزێ ل سەر دەستێ رژێما بەعس ده‌ربازبوون، كو ل سپێده‌هییا رۆژا 24 نیسانا سالا (1974) ێ فرۆكێن شه‌ری یێن رژێما بەعسی ب بۆمبێن ناپالما یێن قەدەغەكری قەڵادزێ و زانكۆیا سلێمانیێ، كو ل وی ده‌می ل سەروەختێ شۆره‌شا مەزنا ئیلۆنێ قەڵادزێ یا ئازادبوو، بۆمبه‌باران كر و ب دەهان قوتابی و وه‌لاتی شەهید و بریندار بوون. ب درێژاهییا مێژوویێ دەڤەرا پشدەر لاندكا خۆڕاگری و شۆڕشێن ئێك لدووڤ ئێك یێن كوردستانێ بوویه، هەرده‌م ل ڕیزا پێشییێ یا قوربانیدانێ بوویە ل شۆڕه‌ش و خەباتا گەلێ كوردستانێ و بزاڤا رزگاری خواز دا، ب تایبەتی ل شۆڕه‌شا مەزنا ئیلۆنێ دا سەنگەرێ ب هێز یێ بەرگریێ و لاندكا خەبات و به‌رخودانێ بوو، پشتی پەشێمان بوونا رژێما بەعس ل رێككەفتنناما (11 ی ئادارێ)، پشدەر ب گشتی و قەڵادزێ ب تایبەتی پەناگەهێ خۆڕاگریێ یێ ئازادیخوازێن كوردستانێ بوو، ل سەر فەرمانا (بارزانیێ نەمر) ل وی ده‌می زانكۆیا ئێكانه یا كوردستانێ كو زانكۆیا سلێمانیێ بوو ڤه‌گۆهاسته باژێرێ قەڵادزێ و ل وێرێ بەردەوامی ب پرۆسا خواندن و زانست و مەعریفێ هاته دان. رژێمێ د وێ رۆژێدا رەشترین كه‌رب و كینا خوه ب سەر قەڵادزێدا باراند و ڤییا ب تەمامی ئیڕادا ژیان دۆستی و شارستانی یا وی باژێری ژناڤ ببه‌ت و ب چەكێ ناپالم یێ قەدەغەكری باژێرێ قەڵادزێ و زانكۆیا سلێمانیێ بۆمبه باران كر و نێزیكی (160) وه‌لاتی و قوتابیێن زانكۆیێ شەهید كرن و پتر ژ (200) وه‌لاتیێن دیتر بریندار بوون ب ده‌هان خانی ژی هه‌رفاندن. ئەڤ كارەساتە هندا مه‌زن بوو، ژ لایێ بارزانیێ نەمر وەكو رۆژا (ماتەمینیا گەلێ كوردستانێ ) هاته بناڤكرن. هەر ب ڤێ هه‌لكه‌فتێ و ل (24 نیسانا 1982) ێ ” خۆپیشاندانه‌كا جەماوەی یا بەرفره‌هـ هاته سازكرن” ژ لایێ دامودەزگه‌هێن حكومه‌تا بەعس ب توندترین شێوە رووبڕوو خۆپیشاندەرێن سڤیل بوون و چەندین وه‌ڵاتی شەهید و برینداربوون و ب ده‌هان قۆتابی و وه‌لاتی هاتنه زیندان كرن. ب ڤێ هه‌لكه‌فتێ وێ چه‌ندێ ب بیر دئینین ن كو خۆڕاگرییا خەلكێ قەڵادزێ و هه‌موو باژێر و باژێركێن كوردستانێ و ئیڕادا پیلایی یا ژیان دۆستی و ئاڤەدانكرن و شارستانی یا گەلێ مه سەركەفت، ڤییان و حەزا ستەمكاریێ و مەرگدۆستییا رژێمێ ژی تێداچوو، نوكه ل جهێ زانكۆیەكا شەهید، كوردستان خودانا ب دەهان زانكۆیێن سەردەمیانەیە. دڤێ هه‌لكه‌فتێ دا سەرێ رێز و نەوازشێ بۆ شەهیدێن قەڵادزێ و هه‌موو شەهیدێن كوردستانێ سەروەرێ وان بارزانی نەمر و كاك ئیدریسی هەرده‌م ل بیر د چه‌مینین. رێز و سلاڤ بۆ گیانێ پاكێ شەهیدێن بۆمبه بارانا (24 نیسانا 1974) ێ و سه‌رهه‌لدانا پیرۆزا (24 نیسانا 1982) ێ یا قەلادزێ. رێز و سلاڤ بۆ شەهیدێن رێگیا رزگاری و سەرفرازی و هەموو وان قارەمانێن گیانێ خوه ژ پێخه‌مه‌ت نیشتیمانێ خوه دا بەخشی.
