د دیداره‌كێ دا وه‌زیرا كاروبارێن جڤاكى كوێستان محه‌مه‌د دیاركر، ئێك ژ كارێن وان ئه‌وه گرنگییێ بده‌نه كه‌رتێ تایبه‌ت و مافێ كرێكاران بپارێزن و ده‌لیڤێن كارى بو گه‌نجان په‌یدابكه‌ن، لدوور ڤێ چه‌ندێ وه‌زاره‌تا كار ب پشته‌ڤانییا جڤاتا وه‌زیران چه‌ند پێنگاڤه‌ك هاڤێتینه، و یاسایا كاركرنا خوه پیشكێشى جڤانا وه‌زیران كرییه و بریاره دڤێ مه‌هێ دا بچیته ئه‌نجومه‌نێ وه‌زیران و داكو تێبینیێن وان وه‌ربگرن و پشتى جه‌ژنێ بچیته د به‌رنامه‌یێ كاركرنێ دا و ره‌وانه په‌رله‌مانێ كوردستانێ بكه‌ن، زێده‌تر وه‌زیرا كاروبارێن جڤاكى ئاشكراكر، وان رێنمایێن ئینانا كریكارێن بیانى بو سنوورداركرنا ئینانا كرێكاران به‌رهه‌ڤكرینه، داكو پتر ده‌رفه‌تێن كاركرنێ بو كرێكارێن نافخوه په‌یدا ببن، ل رێڤه‌به‌رییا گشتى یا كار و ته‌ئمیناتا جڤاكى چه‌ند به‌شه‌ك هه‌نه ژ وان به‌شێ ته‌ئمینا جڤاكى، و برێكا ڤى به‌شى دێ كار لسه‌ر هندێ كه‌ن كو مافێن كرێكاران بهێنه پاراستن داكو لده‌مێ دگه‌هنه ته‌مه‌نێ خانه‌نشینكرنێ، بهێته خانه‌نشینكرن و وه‌كو هه‌ركه‌سه‌كى ل كه‌رتێ گشتى خانه‌نشین ببیت. ژلایه‌كێ دیڤه كوێستان محه‌مه‌دێ گوت : ب پشته‌ڤانییا سه‌رۆكێ حكومه‌تێ ئه‌و شیاینه هه‌موو پێدڤییێن خوه بۆ ڤان به‌شان دابین بكه‌ن داكو لژنه‌یێن وان پتر دچالاك بن، له‌وما كۆمپانیێن ته‌ئمیناتان زێده‌بووینه و پتر ژ 16 هزار كۆمپانى و 133 هزار كرێكار هاتینه ته‌ئمینكرن، ونها پاره‌یێ سندۆقا خانه‌نشین كرنێ گه‌هشتییه 900 ملیار دیناران، و بڤێ رێژه‌یێ بۆ وان دیاردبیت كو ژمارا كرێكار و كۆمپانیێن ته‌ئمینانان زێده‌بوویه، زێده‌تر وه‌زیرا كاروبارێن جڤاكى دیاركر، ل رێڤه‌به‌رییێن كار دا لژنه‌یێن وان دچالاكن داكو سه‌رپه‌رشتی و دووڤچونا جهێن كاران بكه‌ن، و ئه‌و پاره‌یێ سه‌روكێ حكومه‌تێ بۆ زێده‌كرنا كرێیا كرێكاران ئیمزاكرى بوویه 350 هزار دینار، و ده‌مژمێره‌كا كاركرنێ بوویه 2500 دینار، له‌وما پێدڤییه دووڤچونێ بكه‌ن، ژبه‌ركو به‌هرا پترا خودان كۆمپانییان پێگیرییێ ب ڤان بریاران ناكه‌ن.
