بەرپرسەکێ پارتی: داعشێن سووری ل چەندین دەڤەرێن عیراقێ ھاتینە دیتن

لڤینێن داعش مەترسی بۆ سەر ھژمارەكا دەڤەران پەیداکریە و بەرپرسەکێ پارتی ل خانەقین لدۆر لڤینێن داعش ھۆشداریێ ددەت و ئاماژەکر، داعشێن سووری گەھشتینە دەڤەرێ و مەترسیێن زێدەتر پەیداکرینە.

جەعفەر مستەفا، بەرپرسێ لقا پارتی ل خانەقین بۆ ئاژانسا خانی دیارکر” چەند رۆژە چەکدارێن داعش لڤینێن خوه‌ ل دەڤەرا دیالە و خانەقین زێدەکرینە چەندین جارانژی ھێرش بۆ سەر ھێزێن عیراقی و وەلاتیێن سڤیل و پێشمەرگەی ئەنجامداینە، ددەمێ نوکەدا مەترسیا داعش زۆرترە لبەرێ، چونکە ھێزێن عیراقی نەشێن بچنە ھندەک دەڤەرێن داعش تێدانە و چەندین دەڤەر ھەنە بن کۆنتڕۆلا چەکدارێن داعشن”.

جەعفەر مستەفا ئاشکراکر” چەکدارێن داعش ل سووریێ ھاتینە ناڤا عیراقێ و خۆ گەھاندیە دەڤەرێن کوردستانی یێن دەرڤەی ئیدارا حوکمەتا ھەرێما کوردستانێ، ژبەرکو وەکی خەلکێ دەڤەرێ و ھێزێن ئەمنی دیارکری، ئەو داعشێن ڤێ دوماھیێ ھاتینەدیتن زێدەتر داعشێن بیانینە ل سووریێ ھاتینە عێراقێ و تاکتیکا شەڕێ وانژی جودایە، لەوڕا ئەگەر پێشمەرگە نەڤەگەڕیته‌ دەڤەرێ دێ ل داھاتی مەترسیێن داعشێ زێدەتربن”.