كازمی ل گه‌ل سه‌رۆك هۆزێن شنگالێ كۆمبوو

ئه‌ڤرۆ دوشه‌مبی 9/5/2022 ێ ” سه‌رۆك وه‌زیرێن عێراقێ ل ‌گه‌ل شانده‌كێ قه‌زا شنگالێ كۆمبوو.

نڤێسینگه‌ها راگه‌هاندنا سه‌رۆك وه‌زیرێن عێراقێ دیار كرییه‌، ئه‌ڤرۆ مسته‌فا كازمی پێشوازی ل‌ شانده‌كێ خۆجهێن قه‌زا شنگالێ كرییه‌، كو پێكهاتبوون ژ ریهـسپی و سه‌رۆك هۆزان.

ئه‌و ژی گۆتییه‌، د وێ دیدارێ دا هه‌ر ئێك ژ شیره‌تكارێ ئاسایشا نیشتمانی، سه‌رۆك ئه‌ركانێن سوپایێ عێراقێ و جێگرێ فه‌رمانده‌یێ هه‌ڤپشك ئاماده‌ ببوون، كازمی داخواز كر سه‌قامگیری و ئاسایشا شنگالێ بهێته‌ پاراستن.

كازمی گۆتییه‌ ژی، پێدڤییه‌ ژیانا رۆژانه‌ ل‌ شنگال بهێته‌ ئاسایی كرن‌، رێك ب تێكده‌ران نه‌هێته‌ دان ‌ئاسایشا ڤێ ده‌ڤه‌رێ تێكبده‌ن و “پێدڤییه‌ رێككه‌فتنناما شنگالێ بهێته‌ جێبه‌جێ كرن و ئارمانجا ڤێ رێككه‌فتننامێ‌ دووپاتیبوونا ده‌وله‌تا عێراقێ یه‌ ل وێ ده‌ڤه‌رێ.

كازمی ئه‌و ژی گۆت، دڤێت ب‌ زووترین ده‌م سندۆقا ئاڤه‌دانكرنا شنگالێ بهێته‌ دروست كرن، د كڤانێ یاسایێ بوودجێ گشتی یێ عێراقێ دا هژماره‌كا خه‌لكێ ڤێ ده‌ڤه‌رێ بهێنه‌‌ دامه‌زراندن.