جوتیار عادل پەیڤدارێ حکومەتا هەرێما کوردستانێ د پەیامەکێ دا راگەهاند، حکومەتا هەرێما کوردستانێ وان هەمی نووچە و دەنگوییان رەت دکەت، کو هاتیە گوتن حکومەتا هەرێمێ ب پشتەڤانیا هێزا چەکداری، دەست ب سەر چەند کێلگەهەکێن نەفتا بای حەسەن و داودگورگەی یێن سەر ب کۆمپانیا نەفتا باکوور ل کەرکوکێ دا گرتینە و داگیرکرینە.
پەیڤدارێ حکومەتا هەرێما کوردستانێ دیاکریە،”ئاشکرایە ل گۆرەی دەستوورێ ئیراقێ، سامانێ گشتی یێ هەمی خەلکێ ئیراقێ یەو یێ کۆمپانیەکێ نینە، کۆمپانیا نەفتا باکوور چەندین سالە ب بێ هەبوونا یاسایا نەفت وغازێ کار دکەت و دەستووری پێشیل دکەت، ئەگەر کۆمپانیا نەفتا باکوور د خەما چارەسەرکرنا ئاریشەیان دایە، بلا یاسایا نەفت و غازێ ل گۆرەی دەستووری تشریع بکەت”.
جوتیار عادل ئاماژە کریە، ئەو هەوێن دژی هەرێما کوردستانێ دەستپێکرین ئەگەرێن وان د سیاسینە و چ بنەمایێن یاسای بۆ نینن و ئەو تومەتێن ل دژی هەرێمێ بەلاڤدکەن، دویرن ژ راستیێ و ب تنێ بۆ دروستکرنا تێکدانێ یە ل دژی مافێن خەلکێ کوردستانێ.
