سه‌روكێ حكومه‌تا هه‌رێما كوردستانێ بهه‌لكه‌فتا سالیادا دامه‌زراندنا ئێكه‌تیا ماموستایێن كوردستانێ په‌یامه‌ك به‌لاڤكر ئه‌ڤه ده‌قێ وێیه:
ب هه‌لكه‌فتا بیره‌وه‌رییا شێست سالیا دامه‌زراندنا ئێكه‌تییا ماموستایێن كوردستانێ، گه‌رمترین پیرۆزباهییان ئاراسته‌ى سه‌رۆك و ئه‌ندامێن مه‌كته‌ب و سكرتاریه‌ت و گشت ماموستایێن كوردستانێ دكه‌م و هیڤیا سه‌ركه‌فتنێ بۆ دخوازم.
ماموستایێن كوردستانێ ل سه‌رده‌م و قۆناغێن جوداجودا یێن خه‌باتا گه‌لێ كوردستانێ تا ئه‌ڤرۆ، رۆله‌كێ دیار و پێشه‌نگ ل به‌رگریكرنا مافێن ره‌وا یێن خه‌لكێ كوردستانێ و پێگه‌هاندنا نڤشێ نوى و هشیاركرنا كومه‌لگه‌هێ هه‌بوویه، بوویه ب رێزڤه یادا خه‌بات و تێكۆشان و رۆلێ گشت ماموستایێن كوردستانێ د گه‌هاندنا په‌یاما پیرۆز یا په‌روه‌رده و فێركرنێ دا دكه‌ین.
ماموستا دشێن ب رێیا په‌روه‌رده‌یه‌كا درۆست و پێشكه‌فتى، كومه‌لگه‌هه‌كا ته‌ندرۆست درۆست بكه‌ن، كومه‌لگه‌هه‌ك كۆ مرۆڤێ نشتیمان په‌روه‌ر و داهێنه‌ر درۆست بكه‌ت و پشكه‌ك بیت ژ پرۆسا پێشخستن و گه‌شه‌پێدانا كوردستانێ. سوپاسییا ماموستایێن كوردستانێ دكه‌م كۆ سه‌ره‌راى ره‌وشێن سه‌خت و دژوار هه‌موو بزاڤ كرن ژبۆ وێ یه‌كێ پرۆسا خواندنێ یا به‌رده‌وام بیت. هیڤیدارم حكومه‌تا هه‌رێما كوردستانێ ب هه‌ڤكارییا هه‌موو لایان بشێت خزمه‌ته‌كا زێده‌تر و شایسته‌تر یا مامۆستایێن كوردستانێ بكه‌ت.
مه‌سروور بارزانى
سه‌رۆكێ حكومه‌تا هه‌رێما كوردستانێ
