بۆ ڕێڤەبەرییا سکرێ دهۆکێ

زمان و ئاوایێ نڤێسینێ نە ب تنێ بۆ زمانڤانان گرنگە، بەلکو هەر سازییەکێ سەرەدەرییێ ل گەل ڕاگەهاندنی بکەت و بەیاننامە و ڕوهنکرنێن نڤێسکی بەلاڤ بکەت، پێدڤییە ب چاڤەکێ مەزن تەماشەی ڕێنڤیس و ڕێکخستنا پەیڤ و ڕستەیێن بەیاننامە و ڕوهنکرن و ڕاگەهاندنێن خوە بکەت، مخابن ل سازییێن مەیێن میری زمان هاتییە پشتگوهخستن و ڕۆژانە چەندین تێکستێن تژی شاشییێن زمانى د سۆشیال میدیایا وان ڕێڤەبەرییاندا بەلاڤ دبیت، بۆ نموونە:
ئەڤە دەقێ ڕوهنکرنەکا رێڤەبەرییا سکرێ دهۆکێیە کو د پەیجێ وان یێ فەرمیدا ل تۆڕا جڤاکییا فەیسبۆکێ هاتییە بەلاڤکرن:

بمخابنی ڤە هندەك كەس نەنیاس و نەبەپرس ئەڤرۆ دەرگەهێن سكرێ دهوكێ شكاندن بو وێ هندێ ب ئوتومبێلا بچن دناڤ سكری دا و دووبارە ژێنگەها وێ تێك بدەن ، لڤێرێ ئاگەهداریا خەلكێ هێژا دكەین هەر كەسك ڤان جورە كارا بكەت دێ پێرابونێن یاسایی برێكا دادگەهـ دگەل هێنە وەرگرتن و نوكە رێڤەبەریا مە دێ دیڤچوونێ داینە لسەر ئەنجامدەرێن ڤێ كریارێ .

‎رێڤەبەریا سكرێ دهوكێ
١١-٥-٢٠٢٢

(بمخابنی ڤە هندەك كەس نەنیاس و نەبەپرس)
– بمخابنى ڤە: ب مخابنیڤە
– هندەک کەس نەنیاس: هندەک کەسێن نەنیاس
– نەبەپرس: نە بەرپرس
– ئەڤ ڕستە دبیتە: (ب مخابنیڤە هندەک کەسێن نەنیاس و نەبەرپرس)
– دهوكێ: دهۆکێ
– بو: بۆ
– دناڤ سکری دا: د ناڤ سکریدا
– ژێنگەهـ: ژینگەهـ
– لڤێرێ: ل ڤێرێ (دوو سپەیس د ناڤبەرا پەیڤێن (لڤێرێ) و (ئاگەهداریا)دا هاتینە دانان، دڤێت ئێک سپەیس بیت، کو ئەڤەژى شاشییەکا تایپکرنێیە و ب شاشییێن ڕێنڤێسێ دهێتە هژمارتن.
– ئاگەهداریا: ئاگەهدارییا
– هەر کەسک: هەر کەسەک
– جور: جۆر
– کارا: کاران
– ڤان جورە کارا بکەت: ئەڤان جۆرە کاران بکەت
– پێرابونێن: پێڕابوونێن
– برێکا دادگەهـ: ب ڕێکا دادگەهێ
– تێك بدەن ، : تێکبدەن، (سپەیس ل بەرى فاریزێ و پشتى فاریزێ هاتییە دانان، یا درست ئەوە کو چ جاران سپەیس ل بەرى (،) و (.) و (!) و (؟) ناهێتە دانان، ب تنێ ل پشت وان دهێتە دانان.
– دگەل: د گەلدا
– رێڤەبەریا: ڕێڤەبەرییا
– دێ دیڤچوونێ داینە: د دیڤچوونێدایە
– لسەر: ل سەر

-هەروەسا د ڕستەسازییا زمانێ کوردیدا هەموو دەمان (کار) دچیتە دووماهییا ڕستێ، کەواتە ڕستەیا
(رێڤەبەریا مە دێ دیڤچوونێ داینە لسەر ئەنجامدەرێن ڤێ كریارێ .) دێ بیتە (ڕیڤەبەرییا مە ل سەر ئەنجامدەرێن ئەڤێ کریارێ د دیڤچوونێدایە.)

ئەگەر ئەڤە ژى وەها بهێنە نڤێسین درسترە:

– دیڤچوون: دووڤچوون
– ڤێ: ئەڤێ
– ڤان: ئەڤان

ب گشتی، ڕوهنکرنا ڕێڤەبەرییا سکرێ دهۆکێ ژ 62 پەیڤان پێک دهێت، لێ 24 شاشییێن زمانى د ناڤدا هاتینە کرن. ژ ئێک جودا نەکرنا (و، وو، ۆ) و (ێ، ی) و (ر، ڕ) ب کارنەئینانا ئامرازێن پەیوەندییێ ل جهێن وان یێن دروست، نە ڕێزکرنا پێکهاتەیێن سەرەکیێن ڕستەسازییا زمانێ کوردى ل جهێن وان یێن دروست، کێماسییێن تایپکرنێ و نەنڤێسینا هندەک تیپان.. هتد ژ شاشییێن ئەڤێ ڕوهنکرنێنە

پشتى ڕاستڤەکرنێ:

ب مخابنیڤە هندەك كەسێن نەنیاس و نەبەرپرس ئەڤرۆ دەرگەهێن سكرێ دهۆکێ شكاندن، بۆ وێ چەندێ کو ب ترۆمبێلان بچنە د ناڤ سكریدا و دووبارە ژینگەها وێ تێكبدەن، ئەم ل ڤێرێ ئاگەهدارییا خەلكێ هێژا دكەین، هەر كەسەك ئەڤان جۆرە كاران بكەت؛ دێ پێڕابوونێن یاسایی ب ڕێكا دادگەهێ د گەلدا هێنە وەرگرتن و نوكە ڕێڤەبەرییا مە ل سەر ئەنجامدەرێن ئەڤێ كریارێ د دووڤچوونێدایە.

‎ڕێڤەبەرییا سكرێ دهۆكێ
١١-٥-٢٠٢٢