شێرزاد نایف
خودێ ژێرازی خه‌لیفه شێخ زاید به‌ری چه‌ند رۆژه‌كا وه‌غه‌را دووماهییێ كر، ژ به‌ر ناڤوده‌نگی و زه‌نگینییا وی نووچه‌یێ وه‌غه‌را وی ده‌نگ ل جیهانێ ڤه‌دا، زه‌نگینترین كه‌سێ چارێ یه ل سه‌رانسه‌ری ئه‌ردی خودانێ خوه و 18 ملیار دۆلارانه، ژبلی وان پله‌یێن وی یێن دونیایێ هه‌یین، خودانێ بلندترین بورج ل جیهانێ، واته تشتێ مه‌حال ل ده‌ف وی نه‌بوو، ب تنێ مرن شیا وی نه‌هێلیته د ژیانێ دا و مولك و ئه‌ملاكێن وی نه‌شیان تشته‌كی بۆ گیانێ وی بكه‌ن. گه‌له‌ك سه‌ره‌ده‌رییه‌كا مللی هه‌بوو ل گه‌ل هه‌ڤوه‌لاتیێن خوه و خه‌لكێ وی زۆرێ ژێ رازی بوو، هه‌لبه‌ت ژ به‌ر كو ئیمارات وه‌لاته‌كێ زه‌نگینه و حالێ هه‌میان یێ خۆشه و چو ئاریشه نینن، له‌ورا هه‌مییا حه‌ز ژ وی دكرن. هند چاكسازی ئه‌نجامدابوون هه‌تا وی راده‌ی هه‌ر كه‌سه‌كێ بیانی یێ هه‌ڤژینییه‌كێ ل گه‌ل ژنه‌كا ئیماراتی پێكبینیت، عه‌یالێن وی دێ ب ئیماراتی هێنه سه‌رده‌ریكرن. گه‌ر درێژ نه‌كه‌ین ڤێ مژارێ به‌لێ ده‌رباره‌ی ڤێ حه‌یس و به‌یسێ ڤان رۆژان ژی هونه‌رمه‌ندێ مه یێ مللی یێ رحسڤك و خۆشتڤی و سوحبه‌ت خۆش كوڕێ باژارێ من (عه‌بدی كۆچه‌ر) یێ كو دهێته ناسین ب (حاكمێ عادل)، وه‌سیتنامه‌یا خۆ یا مرنێ بۆ كه‌نالەکێ کوردی راگه‌هاندییه كو هه‌كه ژ دووری گیانێ وی وه‌غه‌را داویێ بكه‌ت، پیڤازه‌كێ ب حه‌فكا وی ڤه گرێده‌ن و خاكسپاره بكه‌ن!! هه‌لبه‌ت مه‌ره‌ما خۆ ژی دیاركریه كو ژبه‌ر وێ ئیكێ یه، زه‌لامێن ئاییندار یێن ته‌لقینێ دكه‌ن پێنه‌ڤێت و قه‌بوول ناكه‌ت ئه‌وێ پیڤازێ ل گه‌ل ڤه‌شێرن!، هینگی دا ببیته په‌یامه‌ك بۆ كوڕێن وی و بۆ هه‌می خه‌لكی كو هه‌كه مرۆڤ بمریت خۆ نه‌شێت پیڤازه‌كێ ژی ل گه‌ل خۆ ببه‌ت و كه‌س ژی نه‌شێت تشته‌كی بۆ بكه‌ت!.
ئه‌ڤه ژی دبیته به‌راوردییه‌ك و راستیه‌ك بۆ ئاخفتنا وی كو وه‌غه‌را شێخ زاید ژی هندێ ب شیان نه‌شیا پیڤازه‌كێ ژی ل گه‌ل خوه ببه‌ت ژبلی عه‌مه‌لێ وی یێ كو هه‌می خه‌لك ژێ رازی، ئه‌ڤجا نه خه‌لیفه دكاریت بۆرجێ خوه ل گه‌ل خوه ببه‌ته مرنێ و نه عه‌بدی (خودێ بپارێزیت) دكاریت پیڤازه‌كێ ببه‌ت و نه ئه‌ز ژی دكارم ڤێ گوتارێ ببه‌م و نه تو ژی دكاری تشته‌كی ببه‌ی ژبلی كریارا خوه.!
