ئهڤرۆ پێنجشهمبى 19ى گۆلانا 2022ێ، سهرۆكێ ههرێما كوردستانێ نێچیرڤان بارزانى پێشوازى ل هژمارهكا وان گهنجان كر یێن وهك خوبهخش كار كرى و شیاینه بسهركهڤتییانه زمانێ كوردى ( زاراڤێ سورانى ) دخزمهتگوزارییا گووگل ( Google Translate ) دا زێده بكهن.
د دیدارهكێ مێڤانان چهوانییا دهركهڤتنا هزرا زێدهكرنا زمانێ كوردى دوێ خزمهتگوزارییا گووگلى دا و قوناغ و پێنگاڤێن كارى و كێشهیێن كهڤتینه درێكا واندا ههتا گههشتینه ئهنجامى بهحسكرن، ههروهسا پلان و بهرنامهیێن خوه بۆ پاشهرۆژا وێ خزمهتگوزارییێ و زێدهكرنا دهنگى و ئیمزاكرنا ههڤبهستێ دگهل وان كۆمپانییێن بهرههمێن خوه ل كوردستانێ دفرۆشن بۆ زێدهكرنا سۆفتوێرى یا كوردى دیاركرن.
سهرۆك نێچیرڤان بارزانى خوشحالییا خوه ب ڤى دهستكهڤتێ مهزن دیاركر و ب گهرمى دهستخوشى ل گهنجێن ل دیدارێن ئامادهبووین و ئهوێن ل كوردستانێ یان ل ههر جههكێ دى كار ل سهر ئهڤى پرۆژه كرى كر، ههر وهسا دهستخوشى ل وان كهسان كر یێن كو پێش نها كار بۆ زێدهكرنا شێوازى كرمانجى و ههموو خزمهتگوزاریێن دڤى بیاڤى دا وهك زێدهكرنا كیبۆرد و فونتێن كوردى كرى، و زهحمهت و ماندیبوونا وان ب رێزگرتن و خزمهتكرنا زمان و كولتوورێ كوردى هژمارت.
سهرۆكێ ههرێما كوردستانێ ههموو پشتهڤانییا خوه بۆ كار و پرۆژهیێن وى گرۆپى و ئهوێن حهزدكهن دبیاڤێ ئایتى و تهكنولۆجیایێ دا خزمهتا زمانێ شرینێ كوردى بكهن دیاركر، و داخواز ژێ كر وهكو ئێك تیم بمینن و هاریكاری و پشتهڤانییا ئێك و دو بكهن داكو بشێن كار و داهێنان و خزمهتێن باشتر دڤى بیاڤى دا پێشكێش بكهن، و كهسێن بهرههڤبووى ژى خوشحالییا خوه بۆ پشتهڤانییا سهرۆك نێچیرڤان بارزانى دیاركر.
