بەختیار زێباری
خوە د شانۆگەرییێ ژیدا، سەیدایێ بەڕێز هەر نەهات! پێدڤییە پەنجەرەیەک هەبیت، کو خوەشى و نەخوەشى و دیرۆکا مللەتان تێدا بهێتە بەحسکرن. شانۆ ژى، پەنجەرەیەکا بالکێش و کاریگەرە، کو بابەتێن جوداجودا تێدا بهێنە ئازراندن.
شانۆگەرییا “دبیت بهێت” ئەرێ بۆچى ئەڤ ناڤونیشانە؟
د ئەڤێ شانۆگەرییێدا دەرگەهێ گەلەک پرس و پرسیاران هاتە قوتان، لێ پرسا پرسیاران: پرسیارا چاڤەڕێبوونێ بوو! ژبەر کو، هندى من ل بیرە، ئەم چاڤەڕێینە! و ژییێ چاڤەڕێبوونێ ژ نفشەکێ بۆ ئێکە دى درێژتر دبت!
ـ مانە، ل هەمى سەرێن هەیڤان تو یێ پشتڕاست نینى، کو دێ معاشێ تە هێت یان ناهێت؟
ـ مانە، چەندین سالە چاڤەڕێى کارەبێ، ئاڤێ و گازا سپیى! ئەرێ دێ هێت یان دێ وەکو سالێن چووى بیتە دالغە!
ـ ما قەى، شانۆڤانێن ئەڤى باژێڕى د چاڤەڕێبوونا سەیداى و نووژەنکرنا هۆلا محەمەد عارفێ جزیریدا پیر نەبوون! مانە هەر ڕۆژ خوەش خوەشکەک بۆ وان دگۆت!
ـ ئەرێ کى ژ ماف و خواستەکێن خوە یێ پشتڕاستە و دزانت هەر ڕۆژەکێ دێ هێن؟ و نەخوەزیکێن وى دەمى کو تشتێن مە بڤێن بهێن، چونکى ژ کرێتییێ ژى کرێتتر دکەین! و چ بهایەکێ ئەخلاقى و مرۆڤایەتى پێ نادەین و سەرەدەرییەکا هۆڤانە ل گەل دکەین!
ـ دێ هێت ناهێت، دێ هێت ناهێت… تەخمین بکە، بەربەلاڤترین دەربڕین و گۆتنا خەلکێ ئەڤى وەلاتى بیت!
ئەرێ پێدڤییە ئەم چەند شانۆگەرییێن دى ببینن هەتاکو بزانین و تێبگەهین کو خەلکێ داخوازى هەنە؟ کەسوکارێن شۆڕەشگێڕان گازندە هەنە؟ ئەم دێ کەنگى ژ سوباتا خوە هشیار بین و تێگەهین، کو وژدانێ شویکرییە! مرۆڤایەتى ل نهالەکا کویرە! و هەلویستى کۆچکرییە!
سوپاس بۆ هێژا نێچیرڤان کەکۆ و هەڤالێن شانۆیێ، کو جارەکا دى ئەم ژ خەوا گران هشیارکرین و ئاڤەکا تەزى ب لەشێ مە دا کر! ب دەنگێ بلند گۆتە مە: هشپێوەرینۆ! هوین هێشتا چاڤەڕێنە!
