ئاژانسا خانی:
ده‌زگایێ ره‌وشه‌نبیری و راگه‌هاندنا پارتی دیموكراتی كوردستان ئه‌ڤرۆ د راگه‌هاندنه‌كێ هێرشا مووشه‌كی یا سه‌ر په‌خشێ ته‌له‌فزیونا دهۆك و رادیویا دهۆك و رادیۆیا زاخۆ و کەناڵێ دەلال تیڤی ل چیایێ بێخێرێ ل زاخۆ شه‌رمزاركریه و راگه‌هاندیه: ب ئارمانجگرتنا بنگه‌هێ په‌خش و كه‌نالێ میدیایا ده‌زگه‌هێ مه ژبلی ترسا په‌كه‌كێ ل ده‌نگێ دلێر و وێره‌ك و راستبێژیا راگه‌هاندنا پارتی دیموكراتی كوردستان چ رامانێن دی ناگه‌هینیت.
ده‌زگایێ ره‌وشه‌نبیری و راگه‌هاندنا پارتی دیموكراتی كوردستان د راگه‌هاندنا خوه‌دا ئاماژه ب وێ یه‌كێ ژی كریه: بزاڤا ترسنوكانه یا چه‌كدارێن په‌كه‌كێ بۆ بێده‌نگكرنا ده‌نگێ حه‌قبێژان و ده‌نگێ نه‌ته‌وه‌یی و نیشتیمانی یا میدیاكار و راگه‌هاندنا پارتی یه، هه‌روه‌كو یا ئاشكرایه ئه‌و كریارا نه‌ره‌وا نیشانا هه‌رفتن و شكه‌ستنا به‌رنامه و فكرا ب سه‌رڤه‌چوویی یا وی تاقمێ رێ ل به‌ر به‌رزه‌بوویی یه كو په‌نایێ بۆ هه‌موو كاره‌كێ نه‌مرۆڤانه و نه‌قانوونی دبه‌ن بۆ گه‌هشتن ب مه‌ره‌مێن تاوانكاریێ و داگیركارییانه.
ل دوماهیێ ده‌زگه‌هێ ره‌وشه‌نبیری و راگه‌هاندنا پارتی داخواز ژ چه‌كدارێن په‌كه‌كێ كریه ده‌ستان ژ هه‌رێما كوردستانێ به‌رده‌ن و چ دی نه‌بنه ئه‌گه‌رێ گه‌ف و نه‌سه‌قامگیریا هه‌رێما كوردستانێ.
