ناڤه‌ندا خانی یا ره‌وشه‌نبیری و راگه‌هاندنێ په‌یامه‌ك به‌لاڤ كر
ئەڤرۆ پشتی نیڤرۆ بنگەهەکێ پەخشێ رادیۆ و تێلەڤزیۆنا دهۆکێ ل چیایێ بێخێری ل هنداڤی گەلیێ زاخۆ کەفتە بەر هێرشەکا موشەکی یا چەکدارێن په‌که‌کێ، د ئەنجامدا زیانێن مادی ب ئاڤاهی و دەزگەهێن بنگەهی کەفتینە، خوشبەختانە چ زیانێن گیانی نەبوون.
د دەمەکی دا ئەم ڤێ کریارا تێکدەرانە یا تیرۆرستیی رسوا و شەهمزار و مەحکوم دکەین، ئەم ئاگەهداریا ئەنجامدەرێن وێ کریارێ دکەین، کو ئەڤ بنگەهێ پەخشییێ میدیایی نیشانەکا شارستانیەتێ و پێشکەفتنا هەرێما کوردستانێ یە و خزمەتا مللەتێ کوردستانێ و دوزا رەوایا وێ دکەت، چ گەفێ و مەترسیێ ل سەر چ لایەنا دروست ناکەت و چ بهانە بۆ ئارمانجگرتنا وێ نینە، ئەڤ جۆرە کریارە دەنگ و رەنگ و پەیاما مە راناگریت، هیڤییە په‌که‌کێ د سیاسەتا خوه یا شاش دا بچنەڤە و گورەپانا خوه یا خەباتێ بزانن و ل وێرێ چالاکیێن خوه بکەن.
کوردستانا باکور رووبەرەکێ مەزنترە و باژێرێن وێ پترن و مرۆڤێن وێ بوشترن و چیایێن وێ بلندترن و گەلیێن وێ کوورترن و خەلکێ وێ یێ پێدڤی ئازادیێ یە.
ئەڤ جۆرە کریارە د ژی سازیێن هەرێما کوردستانێ ب تنێ خزمەتا دوژمن و داگیرکەرێن کوردستانێ دکەن، دەم هاتییە په‌که‌که دەستی ژ هەرێما کوردستانێ هه‌لینیت وقەستا وی جهی بکەن یێ پێدڤی ب خەبات و رزگاریێ.
