ئه‌ڤرۆ شه‌مبییێ 6/4/ 2022 ێ” نێچیرڤان بارزانی سەرۆکێ هەرێما کوردستانێ پێشوازی ل مارینا سێرێنی” جێگرا وەزیرێ دەرڤە یێ ئیتالیا و شاندێ ل گه‌ل دا كر.
د وێ کۆمبوونێ دا پەیوەندیێن ئیتالیا ل گه‌ل هەرێما کوردستانێ و عیراقێ و رەوشا ناڤخۆ یا هەرێما کوردستانێ و هەروەسا ترسا تیرۆرێ و لڤینێن داعشێ و په‌یوه‌ندی یێن دناڤبه‌را هه‌ولێرێ و به‌غدا دا هاتنه گۆتوبێژ کرن.
هەر د کۆمبوونێ دا پێشڤەبرنا پەیوەندیێن هەرێما کوردستانێ و ئیتالیا و بەرفرەهکرنا بیاڤێن هاریکاریێ د ناڤبەرا وان دا هاتنە بەحسکرن و سه‌رۆكێ هه‌رێمێ سوپاس و پێزانینێن هه‌رێما كوردستانێ بۆ پشته‌ڤانییا مرۆڤی و سه‌ربازی یێن ئیتالیا ل هه‌رێما كوردستانێ د شه‌رێ دژی داعشێ دا دووپات كرن.
جێگرا وەزیرێ دەرڤە یێ ئیتالیا د کۆمبوونێ دا داخوازیا وەزیرێ دەرڤە یێ ئیتالیا گەهاندە سەرۆک نێچیرڤان بارزانی کو سەرەدانا رۆما بکەت و دووپاتی ل هندێ كر” كو وه‌لاتێ وێ ب گرنگی ڤه به‌رێ خوه دده‌ته هه‌رێما كوردستانێ.
د وێ كۆمبوونێ دا بالیۆزێ ئیتالیا ل به‌غدا و كونسۆلێ وان ل هه‌ولێرێ ئاماده بوون” هه‌روه‌سا چالاكییێن ئیتالیا د بیاڤێن كه‌لتۆری و شوونه‌واری دا ل عیراقێ و هه‌رێما كوردستانێ و ره‌وشا سووریێ و چه‌ند پرسین دیتر هاتنه به‌حس كرن.
