د خه‌له‌كه‌كا ڤێ هه‌فتیێ دا یا درامایا “گورگێ بتنێ” یا كه‌نالێ تەلەڤزنی (ئه‌ى تى ڤى) یا توركى دهێته په‌خشكرن، ب جوره‌كێ سه‌ره‌ده‌ریی دگه‌ل هه‌رێما كوردستانێ دكه‌ت، و سڤكاتى پێدكه‌ت. وه‌زاره‌تا ره‌وشه‌مبیرى و لاوێن هه‌رێما كوردستانێ یاداشته‌كا نه‌رازیبوونێ به‌لاڤكر وتێدا راگه‌هاند، هیڤیخوازین حكومه‌تا توركیا رێكێ ل وان هه‌وێن نه‌دروست بگریت یێن ژ لایێ هنده‌ك خه‌لكێ نه‌ژادپه‌رست و كه‌رب و كین ددلێ واندا و بۆ ئالوزكرنا په‌یوه‌ندیێن دناڤبه‌را گه‌لاندا به‌لاڤ دكه‌ن.
ل خوله‌كا 19 یا زنجیره درامایا (گورگێ بتنێ)، كو د ئێك ژدیمه‌نێن وێ دا كه‌سه‌كێ تورك دهێته داگه‌هكرن، د دادگه‌هێدا ئالایێ كوردستان و وێنه‌یی سه‌رۆك مه‌سعود بارزانى پشت ده‌سته‌یا دادوه‌ران دانایه و هه‌روه‌سا ئێك ژ ئه‌ندامێن ده‌سته‌یسا دادوه‌رى ده‌رسوكه‌كا سور ل سه‌ریه.
هه‌روه‌سا ئه‌و كه‌سه تاوانباره ب كارێ سیخوریی، كوشتن و كارێ مافیاى و ب سفكاتى باس ل حكومه‌ت و دادگه‌ها هه‌رێما كوردستانێ دكه‌ت و دبێژیت، ئه‌و دانپێدانێ ب دادگه‌هـ و حكومه‌تا هه‌رێمێ ناكه‌ت.
تاوانبار د ناڤ ڤێ درامایێ دبێژیت، تورك 1200 ساله ل ده‌ڤه‌رێ دژین و لدور هه‌رێما كوردستانی دبێژیت: كه‌ركوك گۆكتوركه و ئاخا توركومانایه. كه‌ركوك و موسل یێن مه‌نه. مه‌زنترین جادا هه‌ولێرێ موزه‌فه‌ره‌دین گۆكبۆروه، ره‌نگه رۆژه‌كێ ئه‌ڤی ناڤی ژێ ببه‌ن، به‌لێ نه‌شێن دیروكێ ژێببه‌ن.
ئه‌و كه‌سێ كو د درامایێ دا رۆلێ كه‌سه‌كێ مافیا و سیخور ب ناڤێ “تەکین گیریتلی” دگێریت، كو جوگرفیه‌كا ب ناڤێ هه‌رێما كوردستانێ هه‌بیت ره‌تدكه‌ت داخواز دكه‌ت كو لبه‌غدا یان ل توركیا بهێته دادگه‌هـ كرن.
