وه‌زاره‌تا به‌رگرییا توركیا كۆشتنا دوو سه‌ربازێن سۆپایێ وه‌لاتێ خۆه ل باشوورێ كوردستانێ راگه‌هاند.
سپێده‌هییا ئه‌ڤرۆ وه‌زاره‌تا به‌رگرییا توركیا راگه‌هاند، دوهى رۆژا ( 11/6/2022 )ێ ل ده‌ڤه‌را ئۆپه‌راسیۆنا چنگ – قوفل، شه‌ر و پێكدادان دناڤبه‌را سه‌ربازێن سۆپایێ توركیا و په‌كه‌كێ دا رویدا و د ئه‌نجامدا دوو سه‌ربازێن توركیا ب ناڤێن عومه‌ر یه‌لدرم و محه‌مه‌د عه‌لى چاپ هاتنه كۆشتن و دوو سه‌ربازێن دى برینداربوون.
هه‌ر د وێ رۆژێ دا وه‌زاره‌تا به‌رگرییا توركیا راگه‌هاندبوو ژ ئه‌نجامێ په‌قینا بۆمبه‌كا چاندى، دوو سه‌ربازێن وه‌لاتێ وان ب ناڤێن فوئاد ئۆزه‌ر و گۆكان ده‌میر هاتینه كۆشتن و دوو یێن دى برینداربووینه. ب ڤى ره‌نگى ژى د ده‌مێ كێمتر ژ 24 ده‌مژمێران دا چوار سه‌ربازێن تورك هاتینه كۆشتن و چوارێن دى برینداربووینه.
رۆژا ( 18/4/2022 )ێ، سۆپایێ توركیا ئۆپه‌راسیۆنه‌كا سه‌ربازى ب ناڤێ چنگ – قوفل ل ده‌ڤه‌رێن ئاڤاشین و مه‌تین و زاپ بۆ سه‌ر گه‌ریلایێن په‌كه‌كێ ده‌ستپێكر، تا نوكه وه‌زاره‌تا به‌رگریا توركیا كۆشتنا 220 گه‌ریلایان و 26 سه‌ربازێن سۆپایێ توركیا راگه‌هاندییه. د به‌رامبه‌ردا هه‌په‌گێ كۆشتنا 562 سه‌ربازێن توركیا و 41 گه‌ریلایان راگه‌هاندییه.
