ئەمیر ئەترووشی
ل پۆلا ئێکێ ھەتا پۆلا شەشێ ب دووماھی دئینیت، نمرێن وی ھەموو سەد سەدێ نە، خوە دێ بێژی پرۆفیسور کۆرێ پرۆفیسوری یە.. حال چ حالە، من ژ خودێ دڤێت ستەک ھەبیت نمرا کورێ وێ یان کچا وێ ژ سەدێ بینیتە خار یان ژی نەکەتە یێ ئێکێ ل سەر پۆلێ، ژبلی نمرەیان، ل دەمێ ئەزموونان ژی خوە ناوەستینن، چونکو ھەموو پرسیارێن ئەزموونان ب ھێجەتا ھندێ کا چ تشت یێ موھیمە بۆ ئەزموونێ ل بەر دەستن.
رۆژەکێ کۆرێ من ژ ئەزموونێ ھاتە مال، زەوقێ وی یێ فۆلە، گۆت بەس من پرسیارەک نەدزانی ئەو ژی ب خێرا کورێ ستێ من بەرسڤ دا و دێ سەدێ بەم، من گۆتێ ڤێج بۆچی ب خێرا کورێ ستی، گۆت مانێ ئەو ب رەخ من ڤە بوو و ھەر بێھنەکێ ست (دەیکا وی) دھاتە ھنداڤ سەری و پرسیارێن خەلەت بۆ دروستدکرن.
نزانم کەنگی دێ رێڤەبەرێ گشتیێ پەروەردێ ل سەر ڤێ چەندێ راوەستیت، کونفراس و دیبەت بۆ ڤێ ئاریشێ دفەرن، کۆڕین ستا ھەموو سەد سەدێ نە و دەمێ ژ پۆلا شەشێ دبۆرن ژی بەرەڤ قوتابخانێن نموونەیێ دچن و کەس ژی نەشێت ھەڤڕکیا وان بکەت و پرۆفیسورن.
کۆڕین ستا کەرتێ پەروەردێ یێ ژناڤبری، ھندەک ست و زارۆکێن وان ل قوتابخانا یێن بووینە عەسابە و مافیا، من ژ خودێ دڤێت ئێک د بەر وان ڕا باخڤیت. رۆژەکێ دەمێ کۆڕێ من ل قوتابخانا (ر) یا بنەرەتی ل پۆلا چوارێ بنەرەت، ھندەک زارۆکان ئیزعاجا کۆڕێ من کربوو، ئەز ژی چووم من گۆتە وان بۆچی ھوون ئیزعاجا وی دکەن و ھوین ھەمی ھەڤالێن ئێکن و چو دی نە، ل رۆژا پاشتر قوتابخانێ تەلەفونا من کر و گۆت تە سێ قوتابی یێت قوتاین، ئەز چووم و بێ دوو دلی من گۆتێ کا کامیرێن چاڤدێریێ ڤەکەن، پشتی ڤەکرین چو دیار نەبوو، رابوو ڤەکۆلین ل گەل وان ھەرسێ قوتابیان کر دەکەفت درەو و ب تنێ بۆ ھندێ بوو دا ب دلێ خوە ئیزعاجا کۆڕێ من بکەن، پاشی من زانی ئەو ھەرسێ کۆڕێن ستا نە و دایکێن ھەرسێکا ل وێ قوتابخانێ دەوامێ دکەن و ھەرسێ یێن بووینە عەسابە و مافیا و یا ئەو دبێژن دێ ئەو بیت. ژ بەر ھندێ ژی من کۆِرێ خوە ژ وێ قوتابخانێ ڤەگوھاست.
ل قوتابخانەکا دھۆکێ د ئێک سال دا من دیت ماموستایێن پۆلەکا شەشێ بنەرەت ژ ئەگەرێ ململانێیا ماموستایان و بڕیارێن کۆڕێن ستا، ماموستایێن ھەموو بابەتا ھاتنە گوھۆرین، دبێژن چونکو کچا ستێ بەرسڤێن ئەزموونەکێ ب دورستی نەدان، پشتی دوو رۆژان ئێکسەر ئەو ماموستایە ھاتە گوھۆرین.
ئەز نزانم کەنگی دێ بەرپرسیارێن پەروەردێ ل سەر ڤێ پرسێ راوەستن، بلا بڕیارەکێ بدەن ھیچ ماموستایەک ل قوتابخانا زارۆکێن خوە نەمینیت و ئێدی ھەر ماموستایەکا زارۆکێن وێ ل وێ قوتابخانێ بن پێدڤیە ژێک بھێنە دوورکرن، خوە خوارزا و برازا ژی بلا ژ مەت و خالەتێن خوە بھێنە دوورکرن، دا کو روویێ راستەقین یێ کۆڕێن ستا دیار ببیت.
