پەیڤدارێ وەزارەتا ساخلەمییێ: بەغدا د پشکا دەرمانێن ھەرێمێ دا یا پێگیر نینه‌

ئاژانسا خانی ، تایبەت:

پەیڤدارێ وەزارەتا ساخلەمییێ یا حكومه‌تا هه‌رێما كوردستانێ ئاشکرا کر: بەغدا پشکا دەرمانێن ھەرێما کوردستانێ لدووڤ وێ رێژا ھاتییە دیار کرن ناھێنرێت و گۆت ژی، راستەوخۆ دەرمان بۆ پارێزگەھان دھێنە ھنارتن.

د. ئاسۆ حەوێزی، بۆ ئاژانسا خانی زێده‌تر گۆت: ھاتنا دەرمانان ل بەغدا بۆ ھەرێما کوردستانێ یا بەردەوامە، بەلێ چو جاران بەھرا ھەرێما کوردستانێ ژلایێ حوکمەتا عێراقێ ڤە ب دروستی نەگەھشتییە ھەرێما کوردستانێ، چونکی پێدڤییە ١٢%ێ یا دەرمانێن عێراقێ بۆ ھەرێما کوردستانێ بھێنە ھنارتن و بەغدا یا پێگیر نینە ب ھنارتنا وێ رێژا دەرمانان.

ناڤهاتی گۆت ژی” ھنارتنا دەرمانان ب شێوێ مەرکەزییە و ژلایێ دەزگەھێ دەرمانێن عێراقێ” هه‌روه‌سا دەمێ دەرمان دھێنە بەلاڤکرن” راستەوخۆ پشکا ھەر پارێزگەھەکێ دھێتە ھنارتن بۆ کۆگەھێن وێ پارێزگەھێ، ئه‌و ده‌رمانه‌ ناھێنە وەزارەتێ بۆ بەلاڤکرنێ و ئێكسه‌ر بۆ رێڤەبەریێن گشتی یێن ساخلەمییێ ل پارێزگەھان دچن.