دیتنا حكومه‌تا هه‌رێما كوردستانێ ل دۆر ئیداره‌كرنا مه‌له‌فێ نه‌فتێ

1 – حكومه‌تا هه‌رێما كوردستانێ دێ دو كۆمپانییێن گشتى دامه‌زرینیت، ئه‌وژى كۆمپانییا كوردستان بۆ نه‌فت و غازێ (KROC  ) كو یا تایبه‌تمه‌نده‌ ب دیتن و ده‌رئینان و به‌رهه‌مئینانانا نه‌فت و غازێ، هه‌روه‌سا كۆمپانیا كوردستان بۆ بازاركرنا نه‌فتێ ( KOMO) كو دێ یا تایبه‌تمه‌ندبیت ب بازاركرنا نه‌فتێ، دشیاندایه‌ ژلایه‌كیڤه‌ هه‌ماهه‌نگى دناڤبه‌را هه‌ردوو كۆمپانیاندا هه‌بیت، و ژلایه‌كێ دیڤه‌ ئه‌ڤێ هه‌ماهه‌نگییێ‌ په‌یوه‌ندى دگه‌ل كۆمپانیا نه‌فتا نیشتیمانى و كۆمپانیا سۆمۆ هه‌بیت، دگه‌ل هه‌بوونا په‌یوه‌ندى و هه‌ماهه‌نگییا دناڤبه‌را وه‌زاره‌تا نه‌فتا عیراقێ و وه‌زاره‌تا سامانێن سرۆشتى یا حكومه‌تا هه‌رێما كوردستانێ دا، ئه‌ڤه‌ هه‌موو و تمامكرنا ستراكچه‌رێ كۆمپانییا سۆمۆ و راستڤه‌كرنا په‌یره‌وێ نافخۆ، پێدڤى ب دامه‌زراندنا فیدرالى و بریارێن هه‌ڤپشكه‌، كو دێ بیته‌ جهێ هندێ حكومه‌تا هه‌رێما كوردستانێ پشكدارییه‌كا راست و درووست دوێ كۆمپانییێ دا بكه‌ت و پۆستێ جێگرێ سه‌رۆكێ وێ كۆمپانییێ وه‌ربگریت، دهه‌مان ده‌مدا دو نوونه‌رێن هه‌رێما كوردستانێ دێ درێڤه‌برنا كۆمپانییێ دا هه‌بن، هه‌روه‌سا هه‌رێما كوردستانێ مافێ ره‌تكرنێ ( ڤیتۆ ) سه‌باره‌ت ئه‌و بابه‌تێن په‌یوه‌ندى ب هه‌رێما كوردستانێ ڤه‌ هه‌یى هه‌بیت.

2 – سه‌باره‌ت دوسه‌یا پاپه‌ندییا دارایى یا گرێداى ده‌رئه‌نجامێن دوسه‌یێن نه‌فت و غازێ، بوچوونا حكومه‌تا هه‌رێما كوردستانێ دوێ چه‌ندێ دا یا كورته‌ كو دێ ل سه‌ر فرۆتنا رێژه‌یا نه‌فتا به‌رهه‌مئیناى ب رێكا هه‌مان كۆمپانیان یا به‌رده‌وام بیت، و یا پێدڤییه‌ ژلایێ بها و ئه‌و ئاسته‌نگێن كۆمپانیا سۆمۆ ئێخستینه‌ د پرۆسه‌یا فرۆتنا نه‌فتا هه‌رێما كوردستانێ دا، ‌دووباره‌ خاندنا هه‌ڤبه‌ستان بهێته‌كرن.

3 – ده‌رباره‌ى داهاتێ نه‌فتا هه‌نارده‌كرى یا هه‌رێمێ، پێدڤییه‌ ئه‌ڤ داهاته‌ بۆ هژماره‌كا بانكى بهێته‌ ڤه‌گوهاستن كو هه‌رێما كوردستانێ ب خوه‌ ب هه‌لبژێریت و سه‌رپه‌رشتییا ب رێڤه‌برنا وێ بكه‌ت، و ڤه‌گوهاستنا داراىى بۆ هه‌رێما كوردستانێ یا راسته‌وخۆ بیت داكو شایسته‌یێن كۆمپانییێن به‌رهه‌مئینان و ڤه‌گوهاستنێ بده‌ت، هه‌روه‌سا ئه‌وا دمینیت وه‌كو به‌شه‌ك ژ بودجه‌یا حكومه‌تا فیدرال بۆ وه‌زاره‌تا دارایى و ئابوورى یا هه‌رێما كوردستانێ بهێته‌ ڤه‌گوهاستن، هه‌تا كو به‌شێن دى ژ پشكا بودجه‌یا فیدرالى ژ حكومه‌تا فیدرال دگه‌هن.

ئه‌وا دڤى بابه‌تى دا هاتییه‌ خواندن زانیارى و داتا و بزاڤێن حكومه‌تا هه‌رێما كوردستانێ بۆ چاره‌سه‌ركرنا بابه‌تێن هه‌لاویستى یێن تایبه‌ت ب نه‌فت و شایسته‌یێن دارایى یێن خه‌لكێ هه‌رێما كوردستانێ دگه‌ل به‌غدا نه‌.