زانكۆیا دهۆكێ ده‌ست ب به‌رهه‌ڤییان بۆ ب رێڤه‌برنا ئێكه‌م گوپیتكا نێڤده‌وله‌تى یا چاندنێ ل پایزا ئه‌ڤ ساله ل دهۆكێ كر، و شاندەکێ زانکۆیێ دو کۆمبوون دگەل وەزیرا چاندنێ یا حكومه‌ت هه‌رێما كوردستانێ و سەرۆکێ دەستەیا وەبەرهێنانێ كرن.
په‌یڤدارێ زانكۆیا دهۆكێ د. عسمه‌ت خابورى بۆ ئاژانسا خانى دیاركر، ب مەرەما هەڤکاری و هەماهەنگییێ و لدووڤ سیاسەت و پلانێن کابینا نەهێ یا حکومەتا هەرێما کوردستانێ یێن ڤەژاندن و پێشڤەبرنا کەرتێ چاندنێ، شاندەکێ زانکۆیا دهۆک ب سەرۆکاتییا سەرۆکێ زانکۆیێ د. داود سلێمان ئەتروشی، و راگرێن كولیژا زانستێن ئەندازیارییا چاندنێ و کولیژا ڤێتێرنەری و هژمارەکا مامۆستایێن کولیژا چاندنێ، سەرەدانا هەولێرا پایتەخت کر و دو کۆمبوون دگەل وەزیرا چاندنێ بێگەرد تالەبانی، و سەرۆکێ دەستەیا وەبەرهێنانێ ل حکوومەتا هەرێما کوردستانێ د. محەمەد شوکر كرن، و دڤان کۆمبوونان دا سیاسەت و ستراتیژییێن زانکۆیا دهۆکێ دبیاڤێ کەرتێ چاندنێ دا و ب رێڤه‌برنا گوپیتكا نێڤدەولەتییا چاندنێ ژ لایێ زانکۆیا دهۆک ڤە هاتنە گەنگەشەکرن.
زێده‌تر د. عسمه‌ت خابورى ئاشكراكر، وه‌زاره‌تا چاندنێ به‌رهه‌ڤییا خوه یا تمام بۆ پشته‌ڤانیكرنا زانكۆیا دهۆكێ دووپاتكر و دێ هەڤکارا سەرەکی بیت بۆ ب رێڤه‌برنا ڤێ گوپیتكێ و دێ نوینەرێن وەلاتان و وەبەرهێنەر و کۆمپانیێن بیانی بۆ پشكدارییێ دڤێ گوپیتكێ دا داخوازکەت.
هه‌روه‌سا سه‌رۆكێ ده‌سته‌یا وه‌به‌رهێنانىێ ژى ب گه‌رمى پێشوازی ل شاندێ زانکۆیا دهۆک کر و دیارکر، کو ئێک ژ ئارمانجێن سەرەکی ێن کابینا نەهێ یا حکوومەتا هەرێما کوردستانێ، گرنگی پێدان و پێشخستنا کەرتێ چاندنێ یە، كو دیتنا سەرۆکێ حکوومەتا هەرێمێ مەسرور بارزانی، هەمەجۆرکرنا ژێده‌رێن داهاتێ هەرێمێ یە، هەروەسا ب گرنگ زانی زانکۆیێن هەرێمێ و سازیێن دی یێن تایبەت ب ڤەکۆلینان، کارەکێ پتر بۆ پێشڤەبرنا کەرتێ چاندنێ بكه‌ن و مفای ژ ئاخ و ئاڤ و هەوایێ کوردستانێ وەربگرن، و ئاماژە ب وێ چه‌ندێ ژی کر کو دەستەیا وەبەرهێنانێ پێشوازیا هەر پرۆژەیەکی کو ببیتە ئەگەرێ ڤەژاندنا کەرتێ چاندنێ و بلندکرنا ئاستێ بەرهەمئینانا ناڤخۆی دکەت.
