ئه‌ڤرۆ پێنجشه‌مبى 23 خزیرانێ سه‌رۆكێ حكومه‌تا هه‌رێما كوردستانێ مه‌سرور بارزانى، ژ چارچوڤێ سه‌ره‌دانێن خوه بۆ وه‌زاره‌ت و فه‌رمانگه‌هێن حكومه‌تێ، سه‌ره‌دانا وه‌زاره‌تا دارایى و ئابوورى كر و ژلایێ وه‌زیرێ دارایى و ئابوورى ئاوات شێخ جه‌ناب ڤه هاته پێشوازیكرن، و پاشان ب ئاماده‌بوونا وه‌زیر، بریكارێ وه‌زاره‌ت و رێڤه‌به‌رێن گشتى كۆمبوونه‌كا تایبه‌ت ب وه‌زاره‌تا دارایى و ئابووریڤه هاته كرن.
ل ده‌ستپێكێ وه‌زیرێ دارایى كورتییه‌ك ده‌رباره‌ى په‌یكه‌ر و به‌ش و كار و چالاكى و پلان و پرۆژه‌یێن وه‌زاره‌تێ و كاركرنا وان ژ چارچووڤێ كارنامه‌یا كابینه‌یا نه‌هێ پێشكێشكر و ئاماژه دا هندێ كو به‌شه‌كێ مه‌زنێ پرۆسه‌یا چاكسازییێ ب پشته‌ڤانییا ب هێز یا سه‌رۆكێ حكومه‌تێ هاتییه بجهئینان و شیاینه دبیاڤێن كێمكرنا مه‌زاختییان و زێده‌كرنا داهاتى دا پێشكه‌ڤتنێ بده‌ستڤه ببه‌ن.
هه‌روه‌سا دكۆمبوونێ دا ئاماژه ب هندێ هاته دان كو مه‌زاختییێن نه‌یێن پێدڤى یێن حكومه‌تێ ژ 200 ملیۆن دۆلاران بۆ 70 ملیۆن دۆلاران كێمبووینه و ئه‌و 130 ملیۆنێن ماین ژى بۆ گه‌نجیه‌یا گشتى یا حكومه‌تێ هاتینه ڤه‌گه‌راندن و ئه‌ڤ چه‌نده نه‌بوویه ئه‌گه‌ر كو كاروبارێن حكومه‌تێ ب راوه‌ستن، و داهات ژى ب رێژه‌یه‌كا به‌رچاڤ پتر لێ هاتییه، لێ ب هه‌مه‌جووركرنا ژێده‌رێن داهاتى، دشیاندایه هێشتا باشتر لێ بهێت بێى كو بارگرانییێ ل سه‌ر وه‌لاتییان درووست بكه‌ت.
ژلایه‌كێ دیڤه و ل دوور باجه‌یێ وه‌سا هاته دیاركرن، كو حكومه‌تێ چ باجه‌یێن نوو ل سه‌ر وه‌لاتییان نه‌سه‌پاندینه و بتنێ قانوونا وێ بجهئینایه، و ئه‌ڤ چه‌نده دێ داهاتێ حكومه‌تێ زێده‌كه‌ت و ل دووماهییێ دێ هه‌ر بۆ خزمه‌تا وه‌لاتییان هێته ب كارئینان.
