ئاگەهداری بۆ هەمی دەرچوویێن بەشێن چاندن و ڤێتەرنەری یێن نەهاتینە دامەزراندن
پشتەڤان ب یاسایێ هەژمار (٢٠) یا سالا ٢٠٢١ێ، سەرپەرشتیارێن پرۆژێن چاندنێ ل کەرتێ تایبەت و هەروەسا ئاماژە ب رێنمایا هەژمار ٤ یا تایبەتی یێن بجیهئینانا ئەڤێ یاسایێ و وان رێنمایی و رێکاران، لسەر ئاستێ پارێزگەهان و ئیدارێن سەربخۆ، لژنا بلندا وەزارەتێ یا پێکهاتی دێ دەستبکار بیت، بمەرەما ڤاڤارتن و وەرگرتن و زانیاریێن کەسی ژ دەرچوویێن کو نەهاتینە دامەزراندن ل بەشێن چاندن و ڤێتەرنەری کو خاستا کارکرن و سەرپەرشتیاریێ هەنە لگۆرەی باوەرنامە، پسپۆڕی، سالا دەرچوونێ و ئەزموونێ.
ئەڤ پرۆسە ژ رێکەفتی 2022/7/3 دێ دەستپێ کەت و هەتا رێکەفتی 2022/8/1 دێ یا بەردەوام بیت
د هەمان دەمێ دا هەمی فەرمانگەهێن پەیوەندیدارێن وەزارەتێ هەماهەنگی و ئامادەکاریێ دکەن بۆ دانانا بەرنامێ خولێن پێگەهاندن و راهێنانێ ب شیوەیێن تیۆری و پراکتیکی و ئامادەکرنا گرێبەستا کارکرنێ و بجیهئینانا ئەرک و مافێن سەرپەرشتیاران لگۆرەی وان میکانیزمێن کو هاتیە دانان پێنگاڤ ب پێنگاڤ د چارچووڤێ ئەڤێ یاسا و رێنمایێن ئامادەکری دا
بەڕێزێن دەرچوویێن بەشێن چاندن و ڤێتەرنەری لگۆرەی جوگرافی و ئاکنجیبوونا خۆ دشێن سەرەدانا رێڤەبەریێن گشتی یێن چاندنێ ل پارێزگەهان و ئیدارەیێن سەربخۆ بکەن بۆ پێدانا زانیاریان ژلایێ ئەڤێ لژنێ یا کو سەرپەرشتیا تۆمارکرنا ناڤان دکەت.
ئەڤ پێنگاڤا وەزارەتا چاندن و ژێدەرێن ئاڤێ ل کابینا نەهێ یا حکومەتا هەرێما کورفستانێ ئێک ژ کارنامێن ستراتیژیێن گەشەپێدانا سێکتەرا چاندنێ یە کو دەرفەتا کار و مفاداربوونێ بۆ هزاران دەرچوویان دروست دکەت و دێ بیتە وەرچەرخانەکا بهێز یا ڤەژاندنا داهاتێ تاک و خێزان ب رێکا سەرپەرشتیکرنا پرۆژێن کەرتێ تایبەت ب چاڤدێری و سەرپەرشتیا وەزارەتا چاندن و ژێدەرێن ئاڤێ.
تێبینی:
ئەڤ فۆرمە دێ هێتە پڕ کرن و بێ بەرامبەر لسەر ئاستێ فەرمانگەهێن چاندنێ یێن هەرێما کوردستانێ دێ هێتە دابەش کرن.
راگەهاندنا وەزارەتا
چاندن و ژێدەرێن ئاڤێ
