جەبار یاوەر: پرۆسا ئێکگرتنا پێشمەرگەیی یا بەردەوامە

ئاژانسا خانی ، تایبەت:

بەرپرسەکێ بەرێ یێ پێشمەرگەيی ئاشکرا کر، پرۆسا ئێکگرتنا ھێزێن پێشمەرگەيی یا بەردەوامە و گیروبوونا ئێکگرتنا پێشمەرگەيی بۆ ئەگەرێن سیاسی و شەڕێ داعش ل چەند سالێن بوریدا ڤەدگەڕیت.

جەبار یاوەر، ئەمیندارێ بەرێ یێ وەزارەتا پێشمەرگەیي بۆ ئاژانسا خانی دیارکر: پرۆسا ئێکگرتنا ھێزێن پێشمەرگەيى یا بەردەوامە و ذ سالا 2010 ێ وەرە چەند جارەکا ب ئەگەرێن سیاسی پرۆسا ئێکگرتنا ھێزێن پێشمەرگەيی ھاتیيە راگرتن و دیسان دەستپێکريیەڤە، ب تایبەتی ل سەر دەمێ شەڕێ بەرھنگاربوونا داعش، پرۆسا ئێکگرتنا ھێزێن پێشمەرگەيی راوەستیيا، بەلێ نوکە ئه‌و پرۆسه‌ ئێکگرتى یا بڕێڤە دچیت و دێ یا بەردەوام بیت.

گۆت ژی” پێنگاڤێن باش ھاتینە ھاڤێتن بۆ ئێکگرتنا ھێزێن پێشمەرگەیی، بەلێ ھێشتا پێنگاڤێن زۆر ماینە، چونکی ب تنێ ھەر تێکەلکرنا ھێزێ نینە، بەرۆڤاڕی دڤێت پێشمەرگە ب بیر و باوەر ببیتە ھێزەکا نیشتیمانی بۆ بەڕەڤانی کرنێ ژ خەلکی و ئاخا ھەرێما کوردستانێ و بەڕەڤانییێ ژ لایەنێن سیاسی نەکەت.