نڤێسکار و رەوشەنبیر و رۆژنامەڤانێ دهۆکێ یێ دێرین (ئیسماعیل تاهر جانگیر) ل سەر کار وچالاکیێن خوە یێن رۆژانە یێ بەردەوام بوو وەک هەر رۆژەکا دی، وێ رۆژێ (دووشەمبێ ١٢/ ٧/ ٢٠٢١) پشتی دەوامێ د گەل هەڤالێن خوە دەرکەفت بوو و بۆ شیڤێ مێهڤان بوو ل (گوندێ دوولبێ) وپشتی ڤەگەریا یە مالێ… ل دورێن دەمژمێر (١١:٣٠)ی شەڤێ ژ نیشکەکێ ڤە تویشی (جەلتا دلی) بوو وکەفت و های ژ خوە نەما و کەس و کار و هەڤال لێ کۆمبوون وگەهاندە (نەخوشخانا تەنگاڤیان ل دهوکێ) لێ سەد مخابن قەدەرا (سەیدایێ ئیسماعیل) تەمام بوو و رۆژا وی هات و وەغەرا دویماهیکێ کر د ژیێ (٥٢) سالیێ دا دگەل ئەلندا رۆژا سێشەمبێ (١٣ /٧ /٢٠٢١) ل دەمژمێر (١٥ :١٢ ) دووازدە و نیڤ، و تەرمێ وی یێ پیرۆز ل مزگەفتا جودی هاتە شویشتن و کفنکرن و نڤێژ لسەرکرن و ل گورستانا شاخکێ ب ئامادەبوونا مالباتێ و کەس و کار و دوست و هەڤالان هاتە ڤەشارتن و تازیێن خودێ ژی رازی ب رێکا تەلەفونێن کور و برایێن وی هاتنە وەرگرتن ژ بەر پەژیا کۆرۆنایێ .. خەلکێ دهۆکێ و کوردستانێ ب گشتی زور خەمگین و داخبار بوون ب وەغەرکرنا بەرێزی ژ بەر جامیری وخزمەتا وی یا رەوشەنبیری بۆ دهۆکێ… خودێ عەفو و ئازا بکەت و روحا وی ل بەهشتا خوە یا بەرین شاد و ئارام بکەت
(بابێ هێژا) یی هەڤژین و (٣) کور وکچەک ل دویف خوە هێلان (بەرێزان: هێژا، ژێهات، ئەڤین، هوگر – خودێ ژێ وان درێژ بکەت وبپارێزیت-)، و د چلروژیا وی دا ل پەرتوکخانا بەردخانیان ل دهۆکێ (ل رۆژا ئێکشەمبێ ٢٢ /٨ /٢٠٢١) ب ئامادەبوونا مالباتا وی و چەندین دوست و هەڤالان و دەزگەهێن راگەهاندنێ بەرهەمێ وی یێ ب ناڤێ: (دهۆک ژ گوندەکێ مەزن بۆ باژێرەکێ بچویک) هاتە بەلاڤەکرن، وچەند پەیڤ ل دور جامیری وکارتێکرنا رولێ وی د بزاڤا رەوشەنبیری دا ل دهۆکێ هاتنە پێشکێش کرن.. ول رۆژا سێشەمبێ (٢٥ /١/ ٢٠٢٢) زانکۆیا نەورۆز- ب پشتەڤانیا سەرۆکایەتیا هەرێما کوردستانێ وب هەڤکاری دگەل رێڤەبەریا گشتی یا رەوشەنبیری وهونەری ل پارێزگەها دهۆکێ، ورێکخراوا مەند بۆ یەکسانی، و ئێکەتیا نڤێسەرێن کورد- دهوک، و سەندیکا هونەرمەندێن کوردستانێ- دهۆک، و ناڤەندا خانی یا ڕاگەهاندنێ و رەوشەنبیری- دهوک، ورێڤەبەریا پەرتوکخانێن گشتی ل پارێزگەها دهۆکێ- رابوون ب بیرئانینا نڤێسەرێ چەلەنگ ورۆژنامەڤانێ چالاک (سەیدایێ ئیسماعیل) و ب ئیمزاکرنا (٨) پەرتوکێن وی وبەلاڤەکرنا وان ل سەر ئامادەبوویان کە ل سەر ئەرکێ سەرۆکایەتیا هەرێما کوردستانێ هاتبوونە چاپکرن.
(هەژی گوتنێ یە: بەرێز (ئیسماعیل تاهر جانگیر) ژ دایکبوویێ (٥ /١/ ١٩٦٩)یە، ل باژێرێ دهوکێ، وباپیرێ وی خودێ ژی رازی: (حەجی جانگیر قارقاراڤایی ١٨٩٢- ١٩٧٤) ل ناڤ کۆچەرێن زێدک د ژیا و(٢) هەڤژین هەبوون و یێ بێ دوندەهـ بوو، و پشتی هەڤژینا وی یا کوچەرا زێدک وەغەرا دویماهیکێ کری ژ دەڤەرا زێدکا بارکر ومالا خوە ئینا (گوندێ بریفکا شێخا) ل سالا (١٩٣٤ێ) و نیزیکی (١٢) سالان یێن ماینە ل وێرێ ل نیک مەرقەدێن شێخان، پاشی ل سالا (١٩٤٦ێ) مالا خوە یا بارکری و هاتیە (گوندێ قارقاراڤا) ل سالا (١٩٤٦ێ)، و ل وێرێ بۆ جارا سیێ ژیانا هەڤژینیێ یا پێکئینایی د گەل خودێ ژێ رازیێ (ئاسیا قارقاراڤایی) و خودێ (٣) کوڕ و(١) کچەک یێن ژێ داینێ (خودێ ژێ رازیان: حەجی محمد، حەجی علی، طاهر، حەجیا بەسنا)، و یێن ماینە ل (قارقاراڤا) هەتا سالا (١٩٥٢) پاشی خودێ ژێ رازی: (حەجی جانگیر) مالا خوە یا ئینایە دهۆکێ ل ناڤ چەمێ خودێ ژی رازی: دیوالی سەعید ئاغا (١٩٢٧-١٩٨٢) ل تاخێ گرێباسێ، وپشتی چوار- پێنج سالان یێ چوویە تاخێ شێلێ بۆ خوە خانی یێ ئاڤاکری ل نیک مالێن مەسیحیان، وبابێ وی خودێ ژی رازی: (تاهر جانگیر قارقاراڤایی) ل وێرێ خێزان یا پێکئینایی و یێن بووینە دەیبابێن (٨) کور و(٤) کچان: (بەرێزان: ئیسماعیل، خودێ ژێ رازی: نزار ١٩٧٠- ٢٠١٦، هشیار ١٩٧٤، دیار ١٩٧٨، بەیار ١٩٨١، بێوار ١٩٨٥، هەوار ١٩٨٨، گوهدار ١٩٩٠ – خودێ هەمیان بپارێزیت-)، و(کاک ئیسماعیل)ی، قوناغا زارۆکینیێ ل دهۆکێ یا بوراندی لەوما مالا وان وەک دهۆکیێن قارقاراڤایی د هێنە حسابکرن، وپشتی فامابووی یێ چوویە (قوتابخانا بەهدینان یا سەرەتایی) ل سالا (١٩٧٥ێ)، وپشتی خواندنا (ناڤنجیا ئولا) خلاسکری (١٩٨١-١٩٨٤) یێ چوویە خواندنگەها ئایینی (ثانویة الدراسات الإسلامیة) ل دهۆکێ ل سالێن (١٩٨٤-١٩٨٧) و یا خلاسکری و چوویە (کولیژا الفقه) ل نەجەف ( ل سالا ١٩٨٧ێ) بەلێ ل سالێن (١٩٨٩-١٩٩١) نە چوویە دەوامێ ل کۆلیژێ!، وپشتی ڕەڤا ملیۆنی ل سەرهلدانا سالا (١٩٩١ێ) یێ ژ سنوری ڤەگەریایە دهۆکێ پاشی (ل سالا ١٩٩٢ێ) یێ چوویە (کلیة الفقه) ل نەجەف یا تمامکری وخلاسکری و باوەرناما بەکالۆریۆسێ ب شەریعەتی و زانستێن ئایینی و زمانێ عەرەبی یا وەرگرتی ل سالا (١٩٩٣ێ) ویێ ڤەگەریایە دهۆکێ خێزان یا پێکئینایی هەر ل سالا (١٩٩٣ێ).
سەیدایێ (ئیسماعیل) پشتی سەرهلدانێ چەند کارێن راگەهاندنێ یێن جودا جودا یێن کرن ل ڤێرێ ول وێرا هە!، وکارێ کری وەک روژنامەڤان پاشی یێ هاتیە دامەزراندن ل رادیۆیا دهۆکێ (ل سالا ١٩٩٤)، پاشی وەک فەرمانبەر ل رێڤەبەریا گشتی یا رەوشەنبیری وهونەری ل پارێزگەها دهۆکێ (ل سالا ١٩٩٦ێ)، و هاتە هەلبژارتن ب (٧٥) دەنگان وەک سکرتێری سەندیکا رۆژنامەڤانێن کوردستانێ- تایێ دهۆکێ (ل سالێن ٢٠٠٨-٢٠١٢)، و دگەل هندێ بوویە رێڤەبەرێ سەنتەرێن رەوشەنبیری و تیپێن هونەری (ل سالێن ٢٠٠٩- ٢٠١٢)، پاشی بوویە جێگرێ رێڤەبەری چاپ وبەلاڤەکرنی ل پارێزگەها دهۆکێ (ل سالێن ٢٠١٢-٢٠١٤)، پاشی بوویە رێڤەبەڕی کارگێریا رێڤەبەرییا گشتی یا رەوشەنبیری وهونەری ل پارێزگەها دهۆکێ (ل سالێن ٢٠١٤-٢٠١٥)، پاشی ل دویماهیکێ (ل سالا ٢٠١٥) بوویە رێڤەبەرێ پەرتوکخانێن گشتی ل پارێزگەها دهۆکێ… و هەر د وێ پوستێ خوە دا بوو هەتا وەغەرا دویماهیکێ کری، و پرانیا جاران بەرپرس و رێڤەبەر بوو، و ل هەر جهەکێ کار لێ کری شوین تبلێن وی د دیار بوون و هەر دەم وەک رێنیشاندەر و پەناگەهـ و پشتەڤان و شیرەتکارەکێ بهێز بوو بۆ هەڤالێن خوە، زێدەباری ڤان کارێن فەرمی نڤێسەرەکێ چالاک و خودان شیان بوو وەک ئەندامێ ئێکەتیا نڤێسەرێن کورد- تایێ دهۆکێ و پەیوەندیێن خورت د گەل نڤێسەرێن خویانی و بیانی هەبوون و رولەکێ باش هەبوو د ڤیستەڤالێن ئێکەتیێ دا (یا ئێکێ ل سالا ٢٠٠٥، ویا دووێ ل سالا ٢٠٠٦، ویا سیێ ل سالا ٢٠١٠ێ)، هەروەسا ل رادیۆیا دهۆکی دارێژەرێ دەنگ و باسا بوو (ل سالێن ١٩٩٣-٢٠٠٤ێ)، دیسا ل نڤێسینگەها راگەهاندنا پارتی/ دەزگەهێ خانی (ل سالا ١٩٩٧-١٩٩٨ێ)، و داریژەرێ دەنگ و باسان بوو ل تەلەفزیونا دهوکێ (ل ناڤبەرا سالا ١٩٩٨ هەتا سالا ٢٠١١ێ)، هەروەسا پەیامنێری کریە بۆ چەند رۆژنامە وگۆڤار و دەزگەهێن راگەهاندنێ یێن کوردی و عەرەبی (بۆ نموونە: روژنامێن: نداء المستقبل، بەدرخان، الصباح، الصباح الجدید، ومجلة گولان، و وکالة لأنباء المستقلة، ینابیع کوردستان، ئاژانسا پەیامنێر، زاگروس میدیا، رادیویا زاگروس)، و د هەمی ڤان پۆستێن خوە دا رفتار وسەرەدەریەکا زۆر جوان و جامێرانە دگەل فەرمانبەر وهەڤالێن خوە کریە.. لەوما ل سالا (٢٠٠٧ێ) خەلاتێ حافز قازی یێ میدیایێ پێ هاتە بەخشین، و ل سالا (٢٠١٥) خەلاتێ زێری یێ سەندیکا رۆژنامەنڤێسێن کوردستانێ ب دەستخوەڤە ئینا… کە جهێن کەسێن هۆسا بەرکەفتی و ژێهاتی و بۆشاییا وان زوی بزوی نا هێتە گرتن وپڕکرن! .
سەیدایێ (ئیسماعیل تاهر جانگیر) کەسەکێ زور جامێر وهێمن و رحەت بوو .. زۆر سالوخەتێن باشیێ و چاکیێ وقەنجیێ ل دەف هەبوون… ژ وانا:
１- خوە مەزن نەدکر و زور یێ جامێر و سادە و(متواضع) بوو، هەتا خوە دیار نە دکر کە رێڤەبەری پەرتوکخانێن گشتی یە ل پارێزگەها دهۆکێ .. لەوما زۆربەیا خەلکی و دەزگەهێن فەرمی ژی وەسا هزر دکر رێڤەبەری پەرتوکخانا بەدرخانیا یە !. ２- مرۆڤەکێ دلسافی و دلپاقژ و خوشتڤی بوو .. کەرب و کین ژ کەسێ نە ڕادکر و د بنی دا حەز ژ تێکڤەدانێ و گروپکانێ نە دکر، لەوما رفتارێن وی د گەل هەمیان زۆر د جوان و تازە بوون، و پێوەندیێن وی زور د خوش بوون د گەل هەمی ئالی وکەس ودەزگەهان. ３- هەڤالەکێ دلسۆز و دلوڤان و وەفادار و رحسڤک و ئاخفتن شرین و سوحبەتخوش وخزمەتکار بوو، رێزەکا مەزن ل هەڤالینێ دگرت و پشتەڤان وهاریکاری وان بوو، و هەردەم پسیارا هەڤالان دکر و هەکە ئێک نەخۆش ببایە یان رویدانەک بۆ پەیدا ببایە سەرەدانا وی دکر و خەما وی ڕادکر، ل دەف هەڤالێن خوە زۆر یێ خوشتڤی بوو لەوما ب ناڤێ: (رئیس/ سەروک) گازی دکرێ وەک رێزگرتن. ４- کەسەکێ رەوشەنبیر بوو، زۆر د خواند و خوە پێگەهاند بوو، هەر چەندە بسپوریا وی (شەریعە و زانستێن ئیسلامی) بوون، بەلێ زێدەباری بوارێ خوە یێ ئایینی شارەزاییەک زۆر باش هەبوو د بابەتێن بیر و هزران (فکری) دا، و د رەوشەنبیریا گشتی دا، و ب دەهان گۆتار و بابەت نڤێسینە ل دور بیر و هزر و کارێن زانا و فەیلەسوف وبیرمەندێن جیهانی و بابەتێن جڤاکی و مروڤایەتی و یێن گرێدایی خواندنێ و پەرتوکێ و بهایێ وان، و پەیڤ وسمینار یێ ل سەر پێشکێش کرین، و هەمی بزاڤ دکرن دا پتر رێز ل کەسێن رەوشەنبیر و زانا و بسپور بهێتە گرتن وئەو ببنە رێبەر و سەرکێش و پیشەنگێن جڤاکێ کوردستانێ. ５- کەسەکێ کوردپەروەر و جڤاکدوست و خوشمروڤ و نیشتیمانپەروەر وسەبرکێش و خوەڕاگر بوو، زۆر یێ هشیار بوو ل سەر بابەتێن نەتەوی و هەردەم بەڕەڤانی ژ دۆزێن کوردایەتیێ و مافێن مرۆڤی و مافین گەلێ کوردستانێ بگشتی دکر. ６- کەسەکێ چالاک و ب بزاڤ و ب بەرهەم و ب ڕاهاڤێژ بوو، ب دەهان چاڤپێکەفتنێن تەلەفزیۆنی و رادیۆیی ورۆژنامەڤانی یێن دگەلدا هاتینە کرن ل دۆر بابەتێن جودا جودا ب زمانێ کوردی و عەرەبی… و ئەوی بخوە ژی چەند بەرنامێن رەوشەنبیری یێن پێشکێش کرین ل رادیۆیێ و ل تەلەفزیۆنێ، هندە جاران د رۆژەکێ دا چەند بەرنامە هەبوون وچەند چالاکی ئەنجام ددان!، رۆژێن وی د ڤالا نە بوون، بەلکو هەمی دەمێن وی د بەرهەمدار بوون، و کارێن وی هەمی بو ئاڤاکرنا تاکە کەسی و جڤاکەکێ ساخلەم بوون، و پشکداری یا چەندین خول و وورکشوپا دا کری چ کوردستانێ و چ ژدەرڤە. ７- کەسەکێ راستگۆ و پاقژ و دەستپاک بوو، کە باشترین سالوخەتێ فەرمانبەر و رێڤەبەر و بەرپرس و سەرکردێ ڤی سەردەمی دەستپاکی یە، چونکو ئەو کەسێن دزیێ و گەندەلیێ نە کەن و خوە ژ خرابیێ دویر ڕابگرن ئەو کەس مرۆڤێن پاقژ و پیرۆزن ل دەف خودێ و مللەتی.. لەوما سەیدایێ ئیسماعیل ژ وان کەسێن بژوین و پیرۆز بوو، هەتا وەغەرا دویماهیکێ کری نە خانیێ خوە هەبوو و نە ترومبێل !!. ８- سەیدایێ ئیساعیل زور حەز ژ دهۆکێ کر وخەمەکا مەزن ژێ د خار وبەردەوام کار دکر بو بەرچاڤکرنا رویێ گەشێ دهۆکا دێرین و رەسەن وجڤاکێ وێ یێ بەرێ وپاراستنا شینوارێن وێ.. وچەندین بەرنامێن جودا جودا ل سەر ڤێ چەندێ هەبوون وپێشکێش کرینە.. هەر چەندە ژ لایێ ژیێ خوە ڤە یێ بچویک بوو بەلێ حەز و ڤیانا وی بۆ دهۆکێ وکۆمکرنا پێزانینان ل سەر رەوشا خەلکێ وی وەلێ کربوو وەکی کالەمێرەکێ سەد سالی وەسا بەحسێ دهۆکا دێرین وکەڤن دکر، و ببوویە هێما و سومبەلەک بۆ دهۆکێ !. ９- شێوازەکێ زور سرنجڕاکێش وهەستڕاکێش هەبوو د نڤێسینێ دا… زمانزانەکێ پەهلەوان بوو، گوتار و بابەتێن خوە وەکێ چیروک وسەرهاتی بەرچاڤ دکرن.. خویندەڤان نەچار دکر پێدا بچیتە خارێ و هەمیێ بخوینت دا بزانیت دویماهیک چلێهات؟. １０- کەسەکێ بیر تیژ وهزر کویر بوو… ئەو رویدانێن دیتین وبسەری هاتین زۆر ب باشی ڤەدگێران وئەگەر و ئالیێن رویدانێ ب جوانی بەرچاڤ دکرن.. دا بێژی دوهی وپێرە ! بلا ئەو (٣٠-٤٠) سال بیت بورین !. １１- رەخنەگرەکێ ئاڤاکەر بوو، خودان رێبازەکا ناڤنجی (وەسەطی) بوو، یێ دویر بوو ژ توندرەویێ، ل سەر زۆر بابەتان دیتن و بۆچوون و تێبینێین خوە هەبوون، و زۆر ب جوانی وب رێکەکا ناڤنجی وبێ بریندارکرنا کەسێ بەرامبەر بەرچاڤ دکرن. １２- سەرەرای هندێ کە کەسەکێ ڤەکری بوو، مرۆڤەکێ ئولدار و خودان باوەر وپێگیر بوو، خودان رەوشتەکێ بلند بوو، سەرا زێدەگاڤیێ ل سەر ئایینی د هاتە دەنگ وهەلویست د وەرگرت، و رێز ل هەمی ئایینان وبیر وهزر و را ودیتنێن جودا جودا ژی دگرت، وگەنگەشە ب هێمنی دکر، و زێدەگاڤی ل سەر چ کەس وچ ئالیان نە دکر، رفتار وپەیاما وی یا خێرێ وئاڤاکرنێ ومروڤایەتیێ بوو پتر ژ هەر بنەمایەکێ دی. １３- رولەکێ کاریگەر وبەرجاڤ هەبوو د خورتکرنا بزاڤا روژنامەڤانی ومیدیایی ورەوشەنبیری وسەنتەرێن گەنجان دا ل دهوکێ .. کە بەردەوام کار د وان بواران دا دکر ب دلسوزی وب خەمخوری بو دەمێ پتر ژ (٤٠) سالان، هەر ژ ژیێ سنێلەیێ وهەتا وەغەرا دویماهیکێ کری. １４- سەیدایێ ئیسماعیل خەمخورێ پەرتوکان وخواندنا وان بوو کە برێکا رێکخستنا پەرتوکخانێن گشتی ل دهوکێ ول زاخو و ل ئامێدی ول ئاکرێ، وڤەکرنا پەرتوکخانێن گشتی ل سێمێلێ و ل مانگێشکێ ول بامەرنێ ول شێخان… هەول ددا بو بەرفرەهکرن و کەلتورکرنا خواندنا پەرتوکان د ناڤ جڤاکی دا، نەخاسمە پێوەندیێن خورت هەبوون ل گەل پەروەردێ وخواندنگەهێن وان ودگەل زانکویان وکولیژێن وان، ودگەل دام ودەزگەهێن راگەهاندنێ ژ تەلەفزیۆن و رادیۆ و گۆڤار ورۆژنامان، ود گەل کەسایەتی وگەنجێن جڤاکی. １５- زور یێ چالاک بوو د تورێن جڤاکی دا (ئەنترنێتێ) د ڤیا پێزانێن نوی وتازە بۆ خوە پەیدا بکەت د هەر بیاڤەکێ وی د خواست، هەمی دەمان بەرێ وی ل پێشکەفتنێ بوو د بوارێن زانستی و ژیانێ دا.
سەیدایێ (ئیسماعیل) زور د خواند ود نڤێسی… ونڤێسەرەکێ زور زیرەک و شارەزا بوو وکەسەکێ دەست هەلبوو د نڤێسینێ دا.. لەوما د بەر کار وبارێن خوە یێ فەرمانبەریێ و رۆژنامەڤانیێ ومیدیاکاریێ ڕا چەندین پەرتوک نڤێساندینە و چاپکرینە وبەلاڤەکرینە د ژیانا خوە دا ژ وانا:
زێدەباری ئەڤان پەرتوکان چەندین ڤەکولین و نڤێسار وبابەتێن دی یێن جورا وجور ل دور رەوشا دهۆکا دێرین، وبابەتێن رەوشەنبیری یێن گشتی و خواندنا پەرتوکانن و پویتەدان ب گەنجان ومافێن مرۆڤی، ل هندەک رۆژناما وگۆڤاران دا هاتینە بەلاڤەکرن ب زمانێ کوردی و عەرەبی (نەخاسمە گۆڤارا دیجلە- ب پیتێن لاتینی- ١٩٩٨/٢٠٠٣ کار تیدا کریە)، ژ بلی چەند بەرنامێن حەفتیانە ل رادیۆ وتەلەفزیۆنان… خودێ رەوشەنبیرێ دهوکێ یێ ب ناڤ ودەنگ سەیدایێ (ئیسماعیل تاهر جانگیر- بابێ هێژا)ی- عەفو وئازا بکەت- زۆر خزمەتا دهۆکێ و خەلکێ وێ یا کری ودهۆکی قەردارێن وی و خزمەتا وی و جامێریا وی نە.
تێبینی: بۆ ڤان پێزانینان مفا ژ خودێ ژی رازی بخوە، و ژ مالباتا وی، و ژ چەند راپۆرت وچاڤپێکەفتن و ڤیدیۆیان، ونڤێسینەکا رۆژنامەڤانێ بەرێز: ئیبراهیم دێرگژنیکی هاتیە وەرگرتن.
