ئاژانسا خانی: تایبەت
درەنگییا شەڤا دەربازبووی ل دەمژمێر 01:00 پەکەکێ دوو هاولاتییێن خەلکێ ناحیا گرعزێر رەڤاندن.
ئێک ژ کورێن وی کەسێ هاتییە رەڤاندن تایبەت ژبۆ ئاژانسا خانی گۆت، بابێ من بناڤێ “ئەسماعیل نەمر موراد” و برایێ من بناڤێ “ناسر ئەسماعیل نەمر” ل شەڤا دەربازبووی ژ گوندێ جدالێ د باشووری چیایێ شنگالێ ژ مالێ ژ ئالییێ پەکەکێڤە هاتنە رەڤاندن.
گۆت ژی، بەری وی شەڕێ د ناڤبەرا هێزێن یەبەشێ و سۆپایێ عیراقێ دە رووبدە ئەم دگەل وان بوون لێ مە نەخواست ئەم شەڕ دگەل سۆپایێ عیراقێ بکەن و ئەم چوون مالا خوە، لێ ب مەرەما دوورکەڤتنا مە ژ ناڤ رێزێن وان؛ وان بابێ من دگەل برایێ من رەڤاندییە.
گۆت ژی، ئەڤرۆ رۆژا پێنجشەمبێ ئەم دگەل وان ب شەر چوون لێ وان کەسێن مە ئازاد نەکرینە، لێ وان ژمەرە گۆتییە ئەمێ وان سبەهی ئازادبکەن، لێ ئەم نە د وێ باوەرییێ داینە بهێنە ئازادرکرن، ئەڤجا ئەم د بێژن ئەگەر ئەو نەهێنە ئازادرکرن شەڕەکی مەزن وێ دناڤبەرا مە و پەکەکێدا دروست دبیت.
