د. جەعفەر ئێمینكی سەرۆکێ دەستەیا شیرەتکارێن سەرۆکاتيیا ھەرێما کوردستان و نەوزاد ھادی شیرەتکارێ بلند یێ سەرۆکێ هەرێما کوردستانێ ب هەڤپشکییا مونا یاقۆ سەرۆکا دەستەیا سەربەخۆ یا مافێ مرۆڤی ل هەرێما کوردستانێ، پشکداری د کۆنفرانسێ ئاشتی و پێکەوەژیان د چوارچوڤێ دەستوورێ ئیراقێ دا كر کو ب سەرپەرشتییا نەتەوێن ئێکگرتی و پشکدارییا 48 رێکخراوێن جیهانی و نوینەرێن وەزارەتێن دەرڤە یێن پشکەک ژ وەلاتان، ل جنێف برێڤەچوو.
جەعفەر ئێمینکی د گوتارەکێ دا باس ل قۆناغێن دیروکی یێن دێرینێن پێکڤە ژیانا پێکهاتان ل هەرێما کوردستانێ تا قۆناغا نوکە کر و د ڤی چوارچوڤەی دا رۆلێ سەرۆک مەسعود بارزانی و نێچیرڤان بارزانی سەرۆکێ هەرێما کوردستانێ د گرنگیپێدانا پێکهاتان دا بەرچاڤکر.
پاشی نەوزاد ھادی، د گوتنەکێ دا رۆناهی ئێخستە سەر رەوشا ئێزدییان و کار و چالاکییێن نڤیسینگەها تایبەت یا رزگارکرنا رەڤاندییێن ئێزدی کو سەرۆک نێچیرڤان بارزانی دامەزراندییە و تا نوکە د کارێ خۆ دا یا بەردەوامە.
شاندێ هەرێمێ ئاماژەکر، بۆ باشتر کرنا رەوشا پێکڤە ژیانێ ل دەڤەرێن ماددێ 140 یێن دەستووری و پاراستنا پێکهاتان ژ توندوتیژی و تیرۆرێ، هەرێما کوردستانێ بەردەوام دگەل حکومەتا فیدڕال و UN و رێکخراوێن دی یێن نیڤدەولەتی د هەماهەنگییێ دابوویە، بۆ وێ مەرەمێ ژی حکومەتا هەرێما کوردستانێ و حکومەتا فیدڕال یا ئیراقێ رێککەفتنا ئاسایکرنا رەوشا شنگالێ ئیمزاکریە، بەلێ ژ ئەگەرێ هەبوونا هێزێن چەکداری یێن نە یاسایی ل دەڤەرێ، تا نوکە ئەو رێککەفتنە نە هاتیە بجهئینان.
