سه‌رۆكێ هه‌رێما كوردستانێ : پێشوازییێ ل ده‌ستپێشخه‌رییا كازمى دكه‌ین

سه‌رۆكێ هه‌رێما كوردستانێ نێچیرڤان بارزانى راگه‌هاند، دگه‌ل هندێ كو وان لایه‌نێن سیاسى یێن عیراقێ بۆ دانوستاندنان گازیكرینه‌ هه‌ولێرێ، ئه‌و پێشوازییا ده‌ستپێشخه‌رییا مسته‌فا كازمى دكه‌ن.

سه‌رۆكێ هه‌رێما كوردستانێ ل سه‌ر ئه‌كاونتێ خوه‌ یێ تویته‌رى دیاركر، ئه‌و پێشوازییێ ل ده‌ستپێشخه‌رییا سه‌رۆك وه‌زیرێن عیراقێ مسته‌فا كازمى بۆ دانوستاندنێن لایه‌نێن سیاسى دكه‌ن، داكو ببیته‌ رێكه‌ك بۆ ده‌ربازكرنا قه‌یرانا نوكه‌ و كاركرنا پێكڤه‌ بۆ گه‌هاندنا نیشتیمانى ل كه‌ناره‌كێ ئارام.

گوت ژى : عیراق بۆ قۆرتالكرنێ ژ ڤێ ره‌وشى پێدڤى ب دانوستاندن و لێكتێگه‌هشتن و به‌رپرسیاره‌تییا هه‌ڤپشكه‌.

ئه‌ڤ داخویانییا نێچیرڤان بارزانى هات، پشتى دووهى ئێكى ته‌باخا 2022ێ سه‌رۆك وه‌زیرێن عیراقێ مسته‌فا كازمى دراگه‌هاندنه‌كێ دا ل دوور ره‌وشا نوكه‌ یا عیراقێ و خۆپیشاندانان داخوازكرى هه‌موو لایه‌ن ڤه‌گه‌رنه‌ دانوستاندنێن سیاسى و ره‌وشێ ئارام بكه‌ن، و ل سه‌ر بنه‌مایێ نیشتیمانى هزر د چاره‌سه‌ركرنێ دا بكه‌ن.