ئه‌و هێلێن ئاڤێ یێن ب زێده‌گاڤی ژ سكرێ دهۆكێ هاتینه‌ كێشان دێ هێنه‌ راكرن

پارێزگارێ دهوكێ لایه‌نێن په‌یوه‌ندیدار راسپاردن بو چاره‌سه‌ركرنا وان هێلێن ئاڤێ یێن ب رێكن جودا و ب زێده‌گاڤی ژ سكرێ دهوكێ هاتینه‌ كێشان.

پشتی رێڤه‌به‌رییا سكرێ دهوكێ ل دوور وان هێلێن ئاڤێ یێن ب زێده‌گاڤی ژ سكرێ دهوكێ هاتینه‌ كێشان چه‌ند پێشنیاز داینه‌ پارێزگارێ دهوكێ، ئه‌ڤرو رێكه‌فتی 4 – 8 – 2022ێ روژا پێنجشه‌مبی ل سه‌ر راسپاردا د.عه‌لی ته‌ته‌ر پارێزگارێ دهوكێ و ب سه‌رپه‌رشتییا شه‌معون شلیمون ایشو جێگرێ پارێزگارێ دهوكێ و ب ئاماده‌بوونا ئه‌ندازیار فرهاد محمد طاهر رێڤه‌به‌رێ رێڤه‌به‌رییا سكرێ دهوكێ و رێڤه‌به‌رێن ناحییا زاویته‌ و ئاڤا دهوكێ و نوونه‌رێن رێڤه‌به‌رییێن چاندنێ و پۆلیسان و قایمقامییا دهوكێ كۆمبوونه‌ك هاته‌ كرن.

دكۆمبوونێدا به‌حسێ چه‌ند ئاریشێن سكرێ دهوكێ هاته‌ كرن ب تایبه‌ت ئاریشا كێشانا هێلێن ئاڤێ یێن ب زێده‌گاڤی ب رێكا ماتوران یان ( غطاس )ان بۆ ره‌ز و بیستانان و باغچێن تایبه‌ت هاتینه‌ كێشان، پاش لایه‌نێن هاتینه‌ راسپاردن بریاردا هه‌موو ئه‌و هێلێن هاتینه‌ كێشان بهێنه‌ راكرن و به‌روڤاژی ڤێ تا رێكه‌فتی 1 – 9 – 2022ێ هه‌ر وه‌لاتییه‌كێ پێگیر نه‌بیت دێ رێكارێن قانوونى دگه‌لدا هێنه‌ وه‌رگرتن.