پارێزگارێ دهۆكێ دگه‌ل سه‌روك فراكسیون و ئه‌ندامێن په‌رله‌مانێ عیراقێ ژ پارێزگه‌هێن دهۆك و نه‌ینه‌وا كۆمبوو

ئه‌ڤرۆ  8ی تەباخا 2022ێ ل كوچكا مێڤاندارییا د.عه‌لى ته‌ته‌ر پارێزگارێ  دهۆكێ ب ئاماده‌بوونا  فارس عیسا نوونه‌رێ حكومه‌تا هه‌رێمێ ل به‌غدا وفه‌هیم عبدالله سه‌رۆكێ جڤاتا پارێزگه‌هێ وموسا احمد سه‌رۆكێ ده‌زگه‌هێ خێرخوازى یێ بارزانى كۆمبوونه‌ك دگه‌ل سه‌رۆك فراكسیون و ئه‌ندامێن په‌رله‌مانێ عیراقا فیدرال ژ پارێزگه‌هێن دهۆك و نه‌ینه‌وا كر.

دكۆمبوونێدا  به‌حسێ ره‌وشا ئاواره‌ و په‌نابه‌ران ل سنوورێ پارێزگه‌ها دهۆكێ و ئه‌و هاریكارییێن حكومه‌تا هه‌رێمێ پێشكێشدكه‌ت و ئاریشه‌ و پێدڤیێن وان ب هاریكاریێن مروڤایه‌تى هاته‌ كرن.

پارێزگارێ دهۆكێ دپه‌یڤه‌كێدا گوت: ئارمانج ژڤێ كۆمبوونێ ئه‌وه‌ ئه‌م ره‌وشا ئاواره‌ و په‌نابه‌ران ل سنوورێ پارێزگه‌هێ بۆ هه‌وه‌ هه‌موویان به‌رچاڤ بكه‌ین و هه‌موو ب هه‌ڤرا كاره‌كێ مروڤایه‌تى یێ هه‌ڤپشك بكه‌ین و بابه‌تى دگه‌ل به‌پرسێن عیراقێ یێن په‌یوه‌ندیدار ڤه‌كه‌ین كو ره‌وشا وان ل به‌رچاڤ بگرن و هاریكاریێن پێدڤى بو وان بهێنه‌ كرن و ده‌ڤه‌رێن وان ل شنگالێ و جهێن دى بهێنه‌ ئاسایكرن و ئاڤه‌دانكرن  بو وێ چه‌ندێ ئاواره‌  ب حه‌زا خوه‌ ڤه‌گه‌رنه‌ سه‌ر جه‌وارێن خوه‌.

پارێزگارێ دهۆكێ ته‌كه‌زكر، كلیلا چاره‌سه‌رییێ بۆ ڤه‌گه‌ریانا ئاواره‌یێن شنگالێ بجهئینانا رێكه‌فتنا شنگالێ یه،‌ داكو ئارامى په‌یداببیت و خزمه‌تگوزارى بهێنه‌ دابینكرن و ئیداره‌یا شه‌رعى  ڤه‌گه‌ریت و خزمه‌تا  خه‌لكێ شنگالێ بكه‌ت.

پاش سه‌روكێ ده‌زگایێ خێرخوازی یێ بارزانى به‌حسێ وان خزمه‌تان كر یێن كو ده‌زگه‌هێ وان پێشكێشى ئاواره‌ و په‌نابه‌ران دكه‌ن و كێم و كاسیێن خزمه‌تگوزارى یێن هه‌ین ژئه‌نجامێ كێم بوونا هاریكارییان ژلایێ رێكخراوێن مروڤایه‌تیڤه‌ وخواست كو هه‌موو لایه‌ن هاریكاربن دا باشتر خزمه‌تا وان بهێته‌ كرن.

هه‌روه‌سا سه‌روكێ جڤاتا پارێزگه‌هێ ده‌ستخۆشى ل هه‌موو لایه‌نان كر یێن هاریكارییا ئاواره‌ و په‌نابه‌ران دكه‌ن، و خواست هه‌موو لایه‌ن  فشارێ ل به‌رپرسێن عیراقێ بكه‌ن كو هاریكارییا ئاواره‌ و په‌نابه‌ران ل پارێزگه‌هێ بكه‌ن.

دووڤدا په‌رله‌مانتا‌رێن پشكدار روونكرن دانه‌ سه‌ر وان بزاڤان یێن ئه‌و دكه‌ن ژ بۆ بده‌ستڤه‌ئینانا هاریكارییا ژ بۆ باشكرنا ره‌وشا ئاواره‌ و په‌نابه‌ران ل پارێزگه‌ها دهۆكێ و به‌رهه‌ڤییا خۆ بۆ هه‌ر هه‌ڤكارییه‌كێ دیاركر.

ل دووماهییێ نوونه‌رێ حكومه‌تا هه‌رێما كوردستانێ پێشنیاز كر چه‌ند لیژنێن تایبه‌ت ژپه‌رله‌مانتاران بهێنه‌ درووستكرن و هه‌موو ب هه‌ڤرا دگه‌ل نوونه‌راتییا حكومه‌تا كوردستانێ ل به‌غدا دێ دگه‌ل به‌رپرسێن عیراقا فیدرال كۆمبوونا كه‌ین وفشارێ ئێخینه‌ سه‌ر لایه‌نێن په‌یوه‌ندیدار كو هاریكارییا ئاواره‌ و په‌نابه‌ران ل هه‌رێما كوردستانێ و ل پارێزگه‌ها دهۆكێ بكه‌ن.

دهێته‌ زانین هه‌تا نوكه‌ پتر ژ 540 هزار ئاواره‌ و په‌نابه‌ران ل سنوورێ پارێزگه‌ها دهۆكێ هه‌نه‌ ل ناڤ 20 كه‌مپا و ده‌رڤه‌ى كه‌مپا ژیانا خوه‌ ب رێڤه‌دبه‌ن.