وه‌زیرێ به‌ره‌ڤانییا عیراقێ بۆ له‌شكه‌رى : خوه‌ ژ ناكوكییێن سیاسى دووربێخن

پشتى تێكچوونا ره‌وشا سیاسى یا عیراقێ و خۆپیشاندان و مانگرتنێن لایه‌نگرێن ره‌وتا سه‌درى، وه‌زیرێ به‌ره‌ڤانییا عیراقێ داخواز ژ له‌شكه‌رى كر خوه‌ ژ ناكوكییێن سیاسى دوور بێخیت.

وه‌زیرێ به‌ره‌ڤانییا عیراقێ جومعه‌ عینادى د دیدارا خوه‌ دا دگه‌ل فه‌رمانده‌یێن له‌شكه‌رى، جێگرێن سه‌رۆك ئه‌ركانان و رێڤه‌به‌رێ هه‌والگێریی داخوازكر كو خوه‌ ژ ناكوكییێن سیاسى دووربێخین، ژبه‌ركو عیراق دره‌وشه‌كا هه‌لاویستى یا مه‌ترسیدار دا ده‌ربازدبیت.

هه‌روه‌سا دیاركر، ئه‌ركێ پیرۆز یێ له‌شكه‌رى به‌رڤانیكرن ژ گه‌ل و نیشتیمانى یه‌، پێدڤییه‌ له‌شكه‌ر دسنوورێ خوه‌ یێ دیاركرى دا خزمه‌تێ بكه‌ت، ئه‌وێن ئه‌ركێ وان رووبرووبوونا تیرۆرستان بیت پێدڤییه‌ ب كارێ خوه‌ رابن، ئه‌وێن به‌رامبه‌ر خۆپیشانده‌ران دراوه‌ستن پێدڤییه‌ وان بپارێزن.

جومعه‌ عینادى ئاماژه‌ ب هندێ ژی دا، دڤێت ب هه‌ستیارى كار بهێته‌كرن، و ب زیره‌كى و بێ لایه‌نى پێنگاڤ بهێنه‌ هاڤێتن، ژبه‌ركو دوژمن ل ده‌رفه‌تان دگه‌رن.