ئیمزاکرنا هه‌ڤبه‌ستا نووژەنکرنا کنیشتا حزقیال ل شووش ب کۆژمێ 500 هزار دۆلاران دێ هێتە جێبەجێکرن.
د. بێکەس بریفکانی رێڤەبەرێ شوونوار و کەلەپۆران ل دهۆکێ بۆ ئاژانسا خانی دیاركر، ئیمزایا هه‌ڤبه‌ستا نووژەنکرنا کنیشتا حزقیال ب هەماهەنگی دگەل رێکخراوا GAME ART یا چیکی و ب سەرپەرشتسیا رێڤەبەرییا شوونوار و کەلەپورێن دهوکێ و ئاکرێ ب کۆژمێ 500 هزار دۆلاران هاتە کرن.
د. بێکەس زێدەتر گۆت، تێچویا ڤی پرۆژەی کونسۆلخانەیا ئەمریکا ب ستویێ خۆڤە گرتییە کو ب 500 هزار دۆلارانە.
ناڤبری دیارکر، جهێ شوش ئێک ل جهێن مێژوویی یێن گرنگە چەندین شوونوارێن گرنگ لێ هەنە ب تایبەتی پەرستگەهێن ئایینێن کەڤن وەک میترائی و زەردەشتی و جوهی و مەسیحی و موسولمان، جهێ کنیشتا شووش نێزیکە ل ڤان هەمی پەرستگەهان ئەڤەژی وێ چەندێ رادگەهینیت گرنگییا پێکڤە ژیانا ئایینی ل دەڤەرێ بهێزبوویە.
ل دووماهییێ ژی ئاماژە کر، ئەڤ پرۆژەیە وەک قۆناغا ئێکێ دێ هێتە دەست پێکرن ئەوا ل سالا 2020ێ مە پلان دانای بۆ درووستکرنا پارکەکا روحانی یا ئاینێن کەڤن ل شووش، و ببیتە جهەکێ گەشتوگوزاری هەر وەسا پاراستنا ڤان پەرستگەهان و نیشاندانا شارستانییەتا دەڤەرێ. دهێته زانین، جوهی ل سەدەیا هەشتێ بەری زاینێ پاشایێ ئاشووری شلمنصر ئیناینە دەڤەرێ، و تا سالێن پێنجییان ل دەڤەرێ مان ، بۆ ئێکەم جار بەحسا شووش هاتییە کرن دپەرتۆکا گەروکڤان حاخام بنیامین (1130-1170) دا بوو، ل سالا 1880 مردخای ئایدلمان ئێک ل گەرۆکانە بەحسا جوهیێن شووش دکەت کو زۆر گرێدای بوونە ب ئایینێ خۆڤە و دبێژیت هەتا سالا 1884 نێزیکێ 50 جوهییان ل شووش ژیاینە و پاشان زۆربەی وان بەرەڤ باژێرێن مەزن چوونە، هەر وەسا هەتا سالا 1915 چەند مالێن کێم مابوون ل شووش و کنیشت ب کار ئینایە پاشان ب ئێک جاری ڤەگەریانە ئیسرائیل ل سەرەتایێن سالێن پێنجییان.
