دبرگا ئێكێ یا كۆمبوونێ دا سه‌رۆك وه‌زیران ئه‌نجامێن سه‌ره‌دانا شاندێ حكومه‌تا هه‌رێما كوردستانێ ب سه‌رۆكایه‌تییا سه‌رۆك وه‌زیران بۆ به‌غدا و كۆمبوونا دگه‌ل سه‌رۆك وه‌زیرێن عیراقێ و سه‌رۆكێ جڤاتا بلند دیاركرن.
سه‌رۆك وه‌زیران ئاماژه ب هندێ دا، دكۆمبوونێن خوه دگه‌ل لایه‌نێن عیراقێ دا دووپاتى ل هه‌لویستێ هه‌رێما كوردستانێ بۆ چاره‌سه‌ركرنا كێشه‌یان و گه‌هشتن ب رێككه‌ڤتنه‌كا دادپه‌روه‌رانه ل سه‌ر بنه‌مایێن ده‌ستوورى كر.
هه‌ردوو ل سه‌ر درێژكرنا دانوستاندنان دناڤبه‌را وه‌زاره‌تا نه‌فتا عیراقێ و سامانێن سرۆشتى یێن هه‌رێما كوردستانێ دا بۆ گه‌هشتنا چاره‌سه‌رییه‌كا هه‌ڤپشك كو دبه‌رژه‌وه‌ندیا هه‌موو وه‌لاتییێن عیراقێ دا بیت رێككه‌ڤتن.
پاشان وه‌زیرێ پێشمه‌رگه‌ى شوره‌ش ئیسماعیلى باس ل سه‌ره‌دانا شاندێ له‌شكه‌رى یێ هه‌رێمێ بۆ شانشینا ئێكگرتو و ویلایه‌تێن ئێكگرتى یێن ئه‌مریكا كر، و دیاركر دكۆمبوون ودیدارێن خوه دا دووپاتى ل گرنگییا به‌رده‌وامبوونا پشته‌ڤانییا هه‌ڤپه‌یمانان بۆ هێزێن پێشمه‌رگه‌یێ كوردستانێ كر، هه‌روه‌سا سه‌رۆكێ جڤاتا وه‌زیران ژى دووپاتى ل گرنگییا به‌رده‌وامبوونا پرۆسه‌یا چاكسازی و رێكخستنا هێزێن پێشمه‌رگه‌یێ كوردستانێ كر.
برگا دووێ یا كۆمبوونێ یا تایبه‌ت بوو ب خواندنا كورتییه‌كێ ل دوور ناره‌زاییێن وه‌زاره‌تا نه‌فتا عیراقێ دژى وه‌زاره‌تا سامانێن سرۆشتى و كۆمپانییێن نێڤده‌وله‌تى یێن نه‌فت و گازێ ل هه‌رێما كوردستانێ، ئه‌ڤ برگه‌یه ژلایێ سه‌رۆكێ دیوانێ ئومێد سه‌باح و سكرتێرێ جڤاتا وه‌زیران ئامانج ره‌حیم ڤه هاته برێڤه‌برن، و تێدا ئاماژه ب وان بنه‌مایێن ده‌ستوورى یێن هه‌رێما كوردستانێ هاته دان یێن كو حكومه‌تا هه‌رێمێ بۆ داكوكیكرنێ ژ ده‌ستهه‌لات و مافێن ده‌ستوورى یێن هه‌رێمێ پشتبه‌ستنێ ل سه‌ر دكه‌ت، جڤاتا وه‌زیران زێده‌بارى ده‌ستخۆشییێ، هه‌لویستێ خوه دووپاتكر كو هه‌رێما كوردستانێ دێ ل سه‌ر بزاڤێن خوه دگه‌ل حكومه‌تا فیدرال بۆ دیتنا چاره‌سه‌رییه‌كا هه‌ڤپشك كو دخزمه‌تا هه‌موو لایه‌ك و چارچووڤێ ده‌ستوورى دا بیت یا به‌رده‌وام بیت.
