جێگرێ پارێزگارێ دهۆكێ سه‌را چه‌ند پرۆژێن خزمه‌تگوزارى ل ده‌ڤه‌ردارییا ئامێدییێ دا

بو دوڤچوونا پرۆژێن خزمه‌تگوزارى ئه‌وێن ل ده‌ڤه‌ردارییا ئامێدییێ دهێنه‌ بجهئینان ئه‌ڤرۆ 18ى ته‌باخا 2022ێ و ل دووڤ راسپاردێن د.عه‌لى ته‌ته‌ر پارێزگارێ دهۆكێ، ماجد سه‌ید صالح جێگرێ پارێزگارێ دهۆكێ بۆ كاروبارێن ته‌كنیكى ب وه‌كاله‌ت و دگه‌لدا برهان صه‌برى سه‌روكێ ئه‌ندازیاران ل پارێزگه‌هێ جودا جودا سه‌را ده‌ڤه‌ردارییا ئامێدییێ ولقا 17 یا پارتى دیموكراتى كوردستان دا، و  ژلایێ وارشین سه‌لمان ده‌ڤه‌ردارێ ئامێدییێ وعمر ئوره‌یى به‌رپرسێ لقا 18ڤه‌ پێشوازى لێ هاته‌ كرن، دكۆمبوونێن جودا جودا دا به‌حسێ پێدڤیێن خه‌لكێ ده‌ڤه‌رێ و قوناغێن بجهئینانا پرۆژێن خزمه‌تگوزارى هاته‌ كرن.

پاش جێگرێ پارێزگارێ دهۆكێ بو كاروبارێن ته‌كنیكى وشاندێ دگه‌لدا سه‌را ڤان چه‌ند پرۆژان دا وژنێزیك سه‌حكره‌ قوناغێن بجهئینانێ.

1- سه‌ره‌دانا پرۆژێ ئاڤاكرنا فه‌رمانگه‌ها هاتن وچونا ئامێدییێ، پرۆژه‌ ل سه‌ر بودجا حكومه‌تا هه‌ریمێ بكوژمێ (472) ملیون دینارا دهێته‌ ئاڤاكرن وهه‌تا نوكه‌ 15% هاتیه‌ ئه‌نجامدان.

2-  سه‌ره‌دانا پرۆژێ ئاڤاكرنا پشكا دانا ده‌ستوریێن هاژوتنا ترومبێلا پرۆژه‌ ل سه‌ر بودجا حكومه‌تا هه‌رێمێ ب كوژمێ (542) ملیون دیناران دهێته‌ درووستكرن وهه‌تا نوكه‌ 40% هاتییه‌ چێكرن.

3- پاش جێگرێ پارێزگارێ دهۆكێ بۆ كاروبارێن ته‌كنیكى سه‌را ناوچه‌دارییا شێلادزێ دا و ژلایێ رێڤه‌به‌رێ ناحییێ رزگارعبید ڤه‌ پێشوازى لێ هاته‌ كرن ، دروونشته‌نكێدا به‌حسێ رێژا بجهئینانا پرۆژێن سنورێ ناوچه‌دارییێ هاته‌ كرن.

4-  هه‌روه‌سا سه‌ره‌دانا پرۆژێ ڤه‌كرن و قێركرنا چه‌ند رێكان ل ناڤ سه‌نته‌رێ شێلادزێ ل تاخێ ملێ مه‌یدانێ و تاخێ نێروه‌یا و جهێن دى كر و ژ نێزیك سه‌حكره‌ قوناغێن بجهئینانا هه‌ر پرۆژه‌كى.

ل دووماهییێ جێگرێ پارێزگارێ دهۆكێ بۆ كاروبارێن ته‌كنیكى دیاركر كو خزمه‌تكرنا هاولاتییان ئه‌ركه‌ ل سه‌ر ملێن حكومه‌تا هه‌رێمێ و ده‌ستخۆشى ل كۆمپانییێن وان به‌لنده‌را كر یێن وان پرۆژان بجهـ دئینن و ته‌كه‌ز كر كو دڤێت هه‌موو پرۆژه‌ ب كوالیتییه‌كا باش و بله‌ز بهێنه‌ بجهئینان.

هه‌روه‌سا گوت جهێ خوشحالییێ یه‌ كو پتریا پرۆژان ب رێژا 70-80%ێ ل ده‌ڤه‌ردارییا ئامێدییێ هاتینه‌ بجهئینان و پشته‌ڤانییا پارێزگه‌هێ بۆ هه‌ر هاریكاریه‌كێ نیشاندا .

دهێته‌ زانین ل دووڤ به‌رنامێ كابینا نه‌هێ یا حكومه‌تا كوردستانێ ل سالێن(2020 و 2021)ێ پتر ژ 126 پرۆژێن جورا و جور ب كوژمێ پتر ژ(37) ملیار و(500) ملیون دیناران ل سنورێ ده‌ڤه‌ردارییا ئامێدییێ هاتینه‌ بجهئینان و پتریا وان ب رێژا 70-80%ێ هاتینه‌ بجهئینان.

هه‌روه‌سا بۆ سالا 2022ێ (87) پرۆژه‌ ب كوژمێ (15) ملیار و(500) ملیون دیناران دێ ل سنورێ ده‌ڤه‌ردارییا ئامێدییێ هێنه‌ چێكرن.