ئه‌ڤرۆ شه‌مبییێ رێبەرێ رەوتێ سەدر راگەهاند: وی پێشنیازەک بۆ دانوستاندنێن ئێکسەر دابوو نەتەوێن ئێکگرتی، به‌لێ ئالیێن سیاسی یێن عیراقی بەرسڤەکا باش بۆ وێ پێشنیازێ نەبوو.
موقتەدا سەدر، رێبەرێ رەوتێ سەدری د تویتەکێ دا راگەهاند: وی پێشنیازەک دابوو نەتەوێن ئێکگرتی کو کۆمبوونەک ب رامانا دیبەیتێ ل گەل هەموو ئالیێن سیاسی بهێتە کرن و ئەو دیبەت ب رەنگەکێ ئاشکرا و ئێکسەر بۆ وەلاتیان بهێتە ڤەگوهاستن.
هەروەسا نڤیسایە: ئالیێن سیاسی چ بەرسڤەکا د جهێ خۆ دا بۆ پێشنیازا من نەبوو، بەرسڤا وان ب رێیا هندەک ناڤبەینکاران بوو” چ بەحسێ چارەسه‌رییا گەندەلیێ و کێشێن خەلکی تێدا نەبوو.
سەدری داخواز ژ هەموو ئالییان کرییە چاڤەرێیی گاڤا وی یا بهێت بن و ژ نوكه و پێدا ئەو چو دانوستاندنێن نهێنی ناکەت و هەر دانوستاندنەکا ئەو بکەت، دێ ناڤەرۆکا وێ بۆ گەلێ عیراقێ ئاشکرا کەت.
