سه‌رۆكێ هه‌رێما كوردستانێ پێشوازى ل پارێزگارێ ئازه‌ربێجانا رۆژئاڤا كر

سه‌رۆكێ هه‌رێما كوردستانێ نێچیرڤان بارزانى پێشوازى ل پارێزگارێ ئازه‌ربێجانا رۆژئاڤا یا كۆمارا ئیسلامییا ئیرانێ محه‌مه‌د سادق موعته‌دیان كر.

د دیداره‌كێ دا په‌یوه‌ندییێن دناڤبه‌را هه‌رێما كوردستان و كۆمارا ئیسلامییا ئیرانێ دا و ئاسانكارى و هه‌ماهه‌نگییا زێده‌تر بۆ په‌یوه‌ندییێن ئابوورى و بازرگانییا دناڤبه‌را هه‌ردوو لایاندا و سه‌ره‌دانا گه‌شتیارێن ئیرانێ بۆ جهێن ئایینى یێن عیراقێ ب رێكا ده‌ریێن سنۆرى یێن هه‌رێما كوردستانێ، هاتنه‌ گوتوبێژكرن.

شاندێ مێڤان خۆشحالییا خوه‌ ب سه‌ردانكرنا هه‌رێما كوردستانێ و دیدارا دگه‌ل سه‌رۆكێ هه‌رێمێ نیشاندا و دووپاتكر، دێ هه‌موو بزاڤان كه‌ن ئاسانكارییان بۆ پتر پێشڤه‌برنا په‌یوه‌ندییێن ئابوورى بكه‌ن.

ژلایێ خۆڤه‌ سه‌رۆكێ هه‌رێما كوردستانێ تیشك ئێخسته‌ سه‌ر په‌یوه‌ندییێن دێرین یێن دناڤبه‌را هه‌رێما كوردستان و كۆمارا ئیسلامى یا ئیرانێ دهه‌موو بیاڤاندا، و دووپاتى ل پتر پێشڤه‌برنا ئه‌ڤان په‌یوه‌ندییان كر، و حه‌زا هه‌رێمێ بۆ هاریكاریكرن و باشتركرنا په‌یوه‌ندییان دگه‌ل وه‌لاتێن جیران نیشاندا.