دیلانار بۆ ئاژانسا خانی: جه‌ماوه‌رێ من نوكه‌ پتره‌ ژ ده‌مێ ئه‌ز هونه‌رمه‌ند

 

• هه‌تا نوكه‌ پترى 200 كچان په‌یوه‌ندى ب من كریه‌ و ئه‌و ژی ڤه‌گه‌ریانه‌ رێیا راست

• دپێناڤ هه‌ژاریێ دا بومه‌ هونه‌رمه‌ند، به‌لێ دلێ دایكا من نه‌بوو

• دایكا من ئه‌ز ب بالا پوشى نه‌دیتم، هه‌ست دكه‌م فریشته‌ دێ مزگینیا بالاپوشیا من گه‌هینن وێ

• ئه‌ز نازڤرم هونه‌رى و سترانێن ئاینى ژی نابێژم

• دایكا من چوو وه‌سیه‌ت نه‌كرینه‌ كو ژ هونه‌رى دوركه‌ڤم

• من دخه‌ونا خوه‌ دا ل سه‌ر ئاڤا زه‌م زه‌م خه‌لكه‌كێ زۆر ددیت پیروزباهیا بالا پوشبوونا من دكر

• جه‌ماوه‌رێ من نوكه‌ پتره‌ ژ ده‌مێ ئه‌ز هونه‌رمه‌ند

ئاژانسا خانى، نه‌وزاد هلۆرى:

ده‌ما چه‌ند رۆژایه‌ كچه‌ هونه‌رمه‌ندا باكورێ كوردستانێ كو ل دهۆكێ دژیت، دیلانارا یه‌لدز ده‌ست ژ كارێن هونه‌رى به‌ردا و هه‌موو به‌رهه‌م و ستران و كلیپێن خوه‌ ژی ل تورێن جڤاكى ره‌شكرن، ئه‌و چێرۆكا خوه‌ بۆ ئاژانسا خانى ڤه‌دگێریت.

هونه‌رمه‌ندا كچ، دیلانارا یه‌لدز ل بارا دوركه‌فتن ل هونه‌رى بۆ ئاژانسا خانى گۆت: (به‌لێ وه‌كو دیلانارا من ب ئێكجارى ده‌ست ژ هونه‌رى به‌ردا و خودایێ مه‌زن ژی دزانى كو ئه‌ڤ یه‌ك ب دلێ من نینه‌ و سوپاس بۆ خودێ كو نیعمه‌ت ل گه‌ل من كرى و ژ هونه‌رى دویر كه‌فتیم، هه‌ر چه‌نده‌ ئه‌ز گیروبوم و دڤیا زوتر من ئه‌ڤ بریاره‌ دابایه‌، هه‌رده‌مێ ئه‌ز چوبامه‌ ئاهه‌نگه‌كێ ده‌ما ڤه‌دگه‌ریایم زۆر په‌شیمان دبووم، سوپاس بو خودێ ده‌مێ ئه‌ز هونه‌رمه‌ند ژی من كارێن خراپ و دور ژ ره‌وشتێ مرۆڤایه‌تى نه‌ دكرن و كچه‌ك پاراستى بووم).

زێده‌تر گۆت: (ئه‌ز دخێزانه‌كا هه‌ژار دابووم و مه‌ داهاته‌كێ وه‌سا نه‌بو كو پێ بژین، من دخواست كار بكه‌م، ژبه‌رڤێ بومه‌ سترانبێژ و هونه‌رمه‌ند، به‌لێ دلێ دایكا من نه‌بوو، پشتى وه‌غه‌ركرى ئێدى هونه‌ر ل به‌ر دلێ من ره‌ش بو و سوپاس بۆ خودێ ژێ دوركه‌فتم، دلگرانم كو دایكا من ئه‌ز ب بالا پوش نه‌دیتم، ب ئانه‌هیا خودێ فریشته‌ دێ مزگینیا دوركه‌فتنا من ژ كارێن هونه‌رى و بالا پوشیا من گه‌هینن دایكا من، هه‌ر چه‌ند دایكا من چوو وه‌سیه‌ت ژی نه‌كرن كو ژ كارێن هونه‌رى دوركه‌ڤم، وه‌كو ل هه‌ند جها هاتیه‌ به‌لاڤكرن).

هونه‌رمه‌ندا ناڤبرى د درێژاهیا ئاخفتنێن خودا دیاركر ژی كو ژبه‌ر هه‌ژاریێ و ب نه‌چارى ئه‌وێ كارێ هونه‌رى كریه‌ و دخواست بارێ دارایى ل سه‌ر ل سه‌ر ملێن دایكا خوه‌ سڤك بكه‌ت ب تایبه‌تى پشتى كو بابێ وێ بۆ ده‌مێ 20 سالان ل سه‌را كوردینى هاتیه‌ گرتن و گۆت ژی: (ئێدى ب چوو ئاوایى بۆ دنیایێ كار ناكه‌م، ئه‌ڤرۆ وێڤه‌ دێ ب هه‌موو هێز و شیانێن خوه‌ كار بۆ ئاخره‌تێ كه‌م، ب چوو ئاواى ژى نێزیكێ هونه‌رى نابم ڤه‌ هه‌تا خوه‌ سترانێن ئاینى ژی نابێژم، تنێ دێ قورئانێ خوینم ژبه‌ركو ده‌نگێ ژنێ نابیت بچته‌ گوهێن زه‌لامان، نوكه‌ زۆر ئارامم و سوپاسیا خودێ دكه‌م بۆ ڤێ نیعمه‌تێ، هه‌ست كه‌م خودێ زۆر حه‌ش من دكه‌ت، من دخه‌ونا خوه‌ ژی دای ئاڤا زه‌م زه‌م ددیت و خه‌لكه‌كێ زۆر ل سه‌ر ئاڤێ بوو، كچا مامێ من دگۆت ئه‌ڤه‌ هه‌موو یێن هاتینه‌ پیروزباهیا ته‌ كو بویه‌ بالا پوش).

دیلانارایێ گۆت ژی: (مه‌ هه‌مووان شاشى هه‌نه‌ و ئه‌م هه‌موو خودان كێماسى و گونه‌هین، به‌لێ دڤێت مرۆڤ توبه‌ بكه‌ت و بزڤریت ڤه‌ بۆ خودێ، نوكه‌ پێشوازیا خه‌لكى بۆ من زۆر زێده‌تر بویه‌ ژ ده‌مێ ئه‌ز دناڤا هونه‌رى دا، زۆر كه‌سان ل به‌ر توبا من توبه‌كریه‌ و ئه‌ز بویمه‌ رێنیشانده‌ر بۆ چه‌ندان كچێن دى و پتر ژ 200 كچان ب گریڤه‌ توبه‌یا خوه‌ راگه‌هاندیه‌ و زڤرین بۆ رێیا خودێ، په‌یاما من بۆ خه‌لكى ئه‌وه‌ كو ڤه‌گه‌رن بۆ رێیا خودێ و مرن زۆر نێزیكه‌ و ده‌ست ب گرتنا قورئان و سونه‌تێ بكه‌ن و دوركه‌ڤن ژ كریارێن خراپ و دیڤ خوشیا دنیایێ نه‌چن و خوه‌ بێ ستاره‌ نه‌كه‌ن و بخوه‌ ئاخره‌ت و بحه‌شتێ بكرن).