سهرۆك بارزانى ل یادا سیهـ و چوار سالیا ئهنفالا بادینان پهیامهك بهلاڤكر و تێدا راگههاند، گهلێ مه چ جاران زمانێ زۆرداریێ و تاوانێ قهبیل ناكهت
دهقێ پهیاما سهرۆك بارزانى:
ب ناڤێ خودێ مهزن و دلۆڤان
ل بیست و پێنجى ئابا 1988ێ ههتا شهشى ئهیلولا 1988ێ ل درێژییا زنجیره تاوانێن رژێما عیراقێ ل دژى خهلكێ كوردستانێ، پشكهكا مهزن یا دهڤهر و گۆندێن دهڤهرا بادینان كهڤتنه بهر شالاوێن نهمرۆڤانه یێن كیمیابارانكرن و گرتن و كۆشتن و ڤهگۆهاستنا ب زورى و ئهنفالا وهلاتییێن بێ تاوان ژلایێ هێزێن رژێما وى دهمى یا عیراقێ ڤه.
ژ ئهنجامێ وان تاوانێن نهمرۆڤانه، ب هزاران وهلاتییێن كوردستانێ شههید و بێ سهروشوین و ئاوارهبوون و سهدان گۆند ژى هاتنه ژناڤبرن.
مهبهستا رژێمێ ژ وان كریارێن شۆڤێنى و ئهو تاوانا مهزن، گۆهۆرینا دیمۆگرافییا كوردستانێ و شكاندنا ئیرادا گهلێ كوردستانێ بوو ب رێیا چهكى و ستهمكارییێ. لێ ئیرادهیا گهلێ كوردستانێ بۆ ئازادیخوازییێ ب سهركهڤت و دۆژمن و نهیار و تاوانبار كهڤتنه ناڤ زبلخانهیا دیرۆكێ.
ل یادا سیهـ و چوار سالیا تاوانا ئهنفالا بادینان، سلاڤان بۆ گیانێ پاك یێ شههیدێن كۆمهلكۆژییا كوردێن فهیلى و ئهنفالا بادینان و گهرمیان و بارزان و ههمى شههیدێن رێیا ئازادییا كوردستانێ دهنێرین.
د وێ یادا دلتهزین دا رادگههینین كۆ گهلێ مه چ جاران زمانێ زۆردارى و تاوانان قهبیل ناكهت و پێدڤى یه عیراق ژى قهرهبوویا ههمى وان تاوان و ستهمكارییان بكهت یێن كۆ ل دژى گهلێ مه هاتینه ئهنجام دان.
