سه‌رۆك بارزانى: شۆرەشا ئیلۆنێ بۆ ژێدەرێ ئیلهامێ بۆ خەباتكەران ل هەمی پارچێن دی یێن كوردستانێ

دەقێ پەیاما سەرۆك بارزانی:

ب ناڤێ خودێ مەزن و دلۆڤان

ئەڤرۆ شێست و ئێك سال ب سەر بەرپابوونا شۆرەشا مەزن یا ئیلونێ دا دەربازدبن. د وێ شۆرەشا سەرتاسەری یا گەلێ كوردستانێ دا هەمی پێكهاتێن جڤاكی پشكداری خەباتا نەتەوەی و دیمۆكراسی خواز یا گەلێ خۆە بوون و هەمی پێكهاتێن نەتەوەی و ئایینی یێن كوردستانێ ژی مل ب ملێ كوردان ب رابەرایەتییا بارزانییێ نەمر ل دژی ستەم و داگیركرنێ خەبات كر.

شۆرەشا ئیلۆنێ، شۆرەشا ئیرادە و باوەری ب خۆە بوونا مرۆڤێ كوردستانێ بوو، و بناغەیەكێ موكم و رێكخستی بۆ بەردەوامییا خەباتێ و راوەستیانا گەلێ كوردستانێ ل دژی زۆردارییێ دانا. شۆرەشا ئیلۆنێ ب بهایێن خۆە یێن بلندڤە و ب داكوكیكرنێ و خوراگرییێ و سەركردایەتییا پێشمەرگە و جەماوەری وەكر كۆ دۆزا رەوا یا گەلێ كوردستانێ پێنگاڤێن گەلەك مەزن بەرەڤ پێشڤە بهاڤێژیت و ببیتە ژێدەرێ هێزێ بۆ قۆناغێن دی یێن خەباتا گەلێ كوردستانێ و ژێدەرێ ئیلهامێ بۆ خەباتكەران ل هەمی پارچێن دی یێن كوردستانێ.

د شێست و ئێكەمین سالیادا شۆرەشا ئیلۆنێ دا من رێز بۆ رۆل و ماندی نەناسییا دایكان و ژنان و هەمی وان پێشمەرگە و خەباتكەر و قەهرەمانان هەیە یێن رۆل د وێ شانازییا نەتەوەی دا هەی. چ ئەو قارەمانێن د شۆرەشا ئیلۆنێ دا شەهید بووین یان ژی د ژیانێ دا ماین، چ ئەو سەربلندێن پشكداری شۆرەشێ بووین و هێشتا د ژیانێ دا ماین. وان قارەمانان دیرۆك بۆ گەلێ خۆە درۆست كر و جهێ شانازی و سەربلندییێ نە بۆ مە هەمییان.