محسن دۆسکی: ژڤانێ کۆمبوونێن پەرلەمانی دیار نینە

بڕیارە پەرلەمانێ کوردستانێ ژبۆ پەسەندکرنا ھژمارەکا پڕۆژە قانوونان کۆم ببیت و پەرلەمانتارەکێ پارتی ژی ئاشکراکر، ھێشتا ژڤانێ کۆمبوونێن پەرلەمانی دیار نینە و ئەگەرێ راگرتنا کۆمبوونان ژی نەھاتییە دیارکرن.

محسن دۆسکی، پەرلەمانتارێ فڕاکسیۆنا پارتی بۆ ئاژانسا خانی دیارکر، ددەمێ بھێنڤەدانا پەرلەمانی ھژمارەک پڕۆژە قانوون ھاتینە بەرھەڤکرن و بڕیارە د ئەڤی وەرزێ پەرلەمانی دا بکەڤنە ناڤا کارناما کۆمبوونێن پەرلەمانی، بەلێ ھەتا نوکە دیار نینە دێ کەنگی پەرلەمانێ کوردستانێ دەست ب کۆمبوونێن خوە بکەت.

محسن دۆسکی ئاماژەکر، به‌هرا پتر یا پڕۆژە قانوونێن ھاتینە بەرھەڤکرن گرێدایی ژیانا وەلاتیانن ژوان ژی پڕۆژە قانوونا کاری و پڕۆژە قانوونا پەروەردێ و پڕۆژە قانوونێن گرێدای کەرتێ ساخلەمییێ، بەلێ ھەتا نوکە دیار نینە پەرلەمان دێ کەنگی ژڤانێ برێڤەچوونا کۆمبوونان دیارکەت، بەلێ خواستەکا زێده‌تر ھەیە ئەو پرۆژە قانوون ددەمێ دو ھەیڤێن داھاتی یێن تەمەنێ پەرلەمانیدا بھێنە پەسەندکرن.